کراچۍ — مارګله نیوز: د ترهګرۍ ضد محکمې د نقیب الله محسود د وژنې په قضیه کې اووه نور پولیس د شواهدو د نشتوالي له امله برائت کړي دي.
په برائت شویو کسانو کې ګدا حسین، سید صداقت حسین، ریاض احمد، راجه شمیم مختار، امان الله مروت، محمد شعیب مشهور په شوټر او محسن عباس شامل دي.
د څارنوالۍ د معلوماتو له مخې، په همدې قضیه کې پخوانی ایس ایس پي ملیر راؤ انوار او ۱۷ نور پولیس افسران او کارکوونکي مخکې لا برائت شوي وو. له تازه پرېکړې سره د برائت شویو تورنو ټول شمېر ۲۵ ته رسېدلی دی.
د محکمې د اسنادو له مخې، دغه اووه تورن مخکې مفرور بلل شوي وو او د ۲۰۲۳ کال د هغې پرېکړې وروسته یې ځان محکمې ته سپارلی و چې نور تورن پکې برائت شوي وو.
نقیب الله محسود د ۲۰۱۸ کال په جنورۍ کې په کراچۍ کې په یوه داسې پولیس مقابله کې ووژل شو چې وروسته په تحقیق کې جعلي وبلل شوه.
په ۲۰۲۳ کال جنورۍ کې د ترهګرۍ ضد محکمې راؤ انوار او ۱۷ نور تورن د دې له امله برائت کړي وو چې څارنوالۍ تورونه ثابت نه کړل.
په تازه پرېکړه کې پاتې اووه تورن هم د شواهدو د نشتوالي له امله برائت شوي دي.