افغانستان کی ہمسایہ ممالک ایران اور ازبکستان کے ساتھ تجارت تیزی سے بڑھ رہی ہے اور گزشتہ ایک سال کے دوران افغان برآمدات ازبکستان کو 250 فیصد اور ایران کو 100 فیصد تک بڑھ گئی ہیں۔ یہ اعداد و شمار امارت اسلامیہ کی وزارت صنعت و تجارت نے جاری کیے ہیں۔
وزارت کے ترجمان محمد آصف الیاس کے مطابق دونوں ممالک کے ساتھ تجارتی تعلقات وسعت پا رہے ہیں اور ایک سال میں تجارتی حجم میں نمایاں اضافہ ہوا ہے۔ انہوں نے کہا کہ اگرچہ افغانستان اب بھی ان دونوں ملکوں سے زیادہ درآمد کرتا ہے، لیکن برآمدات میں اضافہ حوصلہ افزا ہے۔
ایران افغانستان کے ساتھ سالانہ تجارت کو 10 ارب ڈالر تک لے جانا چاہتا ہے، جبکہ ازبکستان نے 5 ارب ڈالر کا ہدف رکھا ہے۔ اس وقت ایران کے ساتھ افغانستان کی تجارت تقریباً 4 ارب ڈالر اور ازبکستان کے ساتھ ایک ارب ڈالر سے زائد ہے۔
ذرائع کے مطابق 2026 میں ازبکستان کے 14 سے زیادہ تجارتی اور اقتصادی وفود افغانستان آ چکے ہیں، جن کے دوران مختلف شعبوں میں 4 ارب ڈالر مالیت کے 290 سے زائد معاہدوں اور مفاہمتی یادداشتوں پر دستخط ہوئے۔ ایران کے کم از کم چھ وفود بھی تجارت، زراعت، توانائی اور انسداد منشیات تعاون پر بات چیت کے لیے کابل آئے، اور حال ہی میں دونوں ملکوں کے نجی شعبوں نے 45 کروڑ ڈالر سے زائد کی 28 مفاہمتی یادداشتوں پر دستخط کیے۔
افغانستان چیمبر آف کامرس اینڈ انویسٹمنٹ کے عہدیدار احسان اللہ احسان کا کہنا ہے کہ ان روابط نے تینوں ممالک کے نجی شعبوں کے درمیان تعاون کو مضبوط کیا ہے۔ تجارت کے ساتھ ساتھ ایران خواف ہرات ریلوے اور ازبکستان ٹرانس افغان ریلوے منصوبے کے ذریعے علاقائی رابطوں کو فروغ دے رہے ہیں، جو افغان مصنوعات کو علاقائی منڈیوں اور بندرگاہوں تک پہنچانے میں اہم کردار ادا کر سکتے ہیں۔