امریکی صدر ڈونلڈ ٹرمپ نے اسلام آباد میں امریکی سفارت خانے کی سربراہ اور ناظم الامور نیٹالی بیکر کو پاکستان میں امریکہ کی نئی سفیر نامزد کر دیا ہے۔ وائٹ ہاؤس کی جانب سے 9 نومبر کو سینیٹ کو بھیجی گئی نامزدگیوں کی فہرست میں ان کا نام شامل ہے۔
وائٹ ہاؤس کے مطابق ریاست ٹیکساس سے تعلق رکھنے والی نیٹالی بیکر سینیئر فارن سروس کی کیریئر سفارت کار ہیں اور منسٹر کونسلر کے درجے پر فائز ہیں۔ انہیں اسلامی جمہوریہ پاکستان کے لیے غیر معمولی اور مختار کل سفیر کے طور پر نامزد کیا گیا ہے۔ یہ تقرری اب امریکی سینیٹ کی منظوری سے مشروط ہے، جہاں پہلے سینیٹ کی خارجہ تعلقات کمیٹی اس پر غور کرے گی اور پھر پورا ایوان ووٹ دے گا۔
پاکستان میں امریکی سفیر کا عہدہ جنوری 2025 سے خالی ہے، جب آخری سینیٹ سے منظور شدہ سفیر ڈونلڈ بلوم اسلام آباد سے رخصت ہوئے تھے۔ اس کے بعد سے نیٹالی بیکر ناظم الامور کی حیثیت سے مشن کی قیادت کر رہی ہیں۔ وہ اگست 2024 میں ڈپٹی چیف آف مشن کے طور پر اسلام آباد آئی تھیں۔
طویل سفارتی تجربہ
ذرائع کے مطابق پاکستان آنے سے پہلے وہ اگست 2021 سے جولائی 2024 تک قطر کے دارالحکومت دوحہ میں امریکی سفارت خانے کی ڈپٹی چیف آف مشن رہیں۔ وہ امریکی محکمہ خارجہ میں شمالی افریقی امور کے دفتر کی ڈائریکٹر، لیبیا کے لیے امریکی مشن کی ڈپٹی چیف اور ناظم الامور، دبئی میں ایران ریجنل پریزنس آفس کی ڈپٹی ڈائریکٹر اور کویت میں امریکی سفارت خانے کی اکنامک کونسلر بھی رہ چکی ہیں۔
یہ نامزدگی ایسے وقت میں سامنے آئی ہے جب واشنگٹن اور اسلام آباد تجارت، سرمایہ کاری اور علاقائی سلامتی کے شعبوں میں روابط بڑھا رہے ہیں اور پاکستان امریکہ ایران تنازع کے حل کی سفارتی کوششوں میں بھی کردار ادا کر رہا ہے۔ ناظم الامور کی حیثیت سے نیٹالی بیکر پاکستانی حکام سے تجارتی مذاکرات اور سرمایہ کاری کے مواقع پر مسلسل رابطے میں رہی ہیں، اس لیے ان کی نامزدگی کو دوطرفہ تعلقات میں تسلسل کی علامت سمجھا جا رہا ہے۔