پاکستان نے اقوام متحدہ کی سلامتی کونسل میں تقریباً چار سال سے جاری روس یوکرین جنگ میں فوری اور مضبوط جنگ بندی کا مطالبہ کرتے ہوئے دونوں فریقوں پر زور دیا ہے کہ وہ تنازع کو مزید پھیلانے سے گریز کریں اور مذاکرات کی میز پر واپس آئیں۔
اقوام متحدہ میں پاکستان کے مستقل مندوب سفیر سید حیدر علی شاہ نے پیر کو یوکرین پر کونسل کی بریفنگ سے خطاب میں کہا کہ پاکستان لڑائی میں مسلسل اضافے اور اس سے شہریوں اور شہری ڈھانچے کو پہنچنے والے نقصان پر گہری تشویش رکھتا ہے۔ یہ اجلاس یوکرین کی درخواست پر بلایا گیا تھا اور اس کی صدارت لٹویا کی وزیر خارجہ بائبا براژے نے کی۔ اجلاس سے پہلے 29 اکتوبر کو دنیپرو، چرنیہیو اور کریمینچک پر روسی حملوں میں کم از کم 19 افراد ہلاک اور 50 سے زائد زخمی ہوئے تھے۔
پاکستانی مندوب نے کہا کہ فوجی حل کی کوشش صرف کشیدگی بڑھاتی اور متاثرین کی تکلیف کو طول دیتی ہے، جبکہ اس جنگ کے انسانی اثرات اور خوراک و توانائی کی عالمی منڈیوں کو لگنے والے جھٹکے یورپ سے کہیں دور ترقی پذیر ملکوں کو غیر متناسب طور پر متاثر کر رہے ہیں۔ انہوں نے ابوظہبی میں یوکرین اور روس کے درمیان ورکنگ لیول سفارتی ملاقاتوں کی اطلاعات کا خیر مقدم کیا اور کہا کہ کوئی بھی پائیدار امن اقوام متحدہ کے چارٹر اور بین الاقوامی قانون کے مطابق اور تمام فریقوں کے جائز سیکیورٹی خدشات کو مدنظر رکھ کر ہی ممکن ہے۔
اجلاس میں اقوام متحدہ کے اسسٹنٹ سیکریٹری جنرل برائے انسانی امور محمد یحییٰ نے خبردار کیا کہ توانائی کے ڈھانچے پر حملوں کے باعث لاکھوں افراد بجلی اور پانی سے محروم ہیں اور سردیاں اب دور کا خطرہ نہیں رہیں۔ انہوں نے روس کے زیر قبضہ اولیشکی میں انسانی بنیادوں پر ہونے والی عارضی جنگ بندی کو ایک مثال قرار دیا، جس سے امداد پہنچانے اور شہریوں کے انخلا کا راستہ کھلا۔