افغانستان کی نیشنل ڈیزاسٹر مینجمنٹ اتھارٹی اور ڈینش ریفیوجی کونسل کے مائن ایکشن پروگرام نے بارودی سرنگوں اور جنگی دھماکا خیز باقیات کی صفائی کے لیے مجموعی طور پر تقریباً 4.13 ملین ڈالر کے دو معاہدوں پر دستخط کیے ہیں۔
افغان حکام کے مطابق منصوبوں کے تحت 15 لاکھ مربع میٹر سے زیادہ آلودہ زمین کی سروے اور صفائی کی سرگرمیاں کی جائیں گی۔ پروگرام میں فوری طور پر دھماکا خیز مواد ناکارہ بنانے کے کام اور بارودی سرنگوں کے خطرات سے متعلق آگاہی بھی شامل ہے۔
Ariana News کے مطابق ایک منصوبہ 13 صوبوں میں سرگرمیوں کا احاطہ کرے گا، جبکہ دوسرے میں کابل، قندھار، نیمروز اور ننگرہار سمیت واپس آنے والے افغانوں کے لیے خطرات سے آگاہی اور متاثرین کی مدد شامل ہے۔
افغانستان میں کئی دہائیوں کی جنگ کے باعث بارودی سرنگیں اور دیگر دھماکا خیز باقیات اب بھی شہریوں کے لیے خطرہ ہیں۔ اقوام متحدہ کے مائن ایکشن پروگرام کے مطابق ملک میں طویل عرصے سے بڑے پیمانے پر صفائی اور خطرات سے آگاہی کا کام جاری ہے۔