افغانستان نے ایشین گیمز کے مردوں کے کرکٹ مقابلوں میں جاپان کو 48 رنز سے شکست دے کر اپنی مہم کا کامیاب آغاز کیا ہے۔ نشن کے کوروگی اسپورٹس پارک میں افغانستان نے پہلے بیٹنگ کرتے ہوئے 20 اوورز میں 6 وکٹوں پر 129 رنز بنائے، جس کے جواب میں جاپان کی ٹیم 19.3 اوورز میں 81 رنز پر آؤٹ ہوگئی۔
افغانستان کے لیے محمد اکرم نے 34 رنز بنائے جبکہ درویش رسولی نے 29 اور محمد اسحاق نے آخری اوورز میں اہم رنز جوڑے۔ جاپان کے بولرز نے ابتدا اور درمیانی اوورز میں رنز کی رفتار محدود رکھی، تاہم افغانستان نے آخری چار اوورز میں اسکور کو قابلِ دفاع مجموعے تک پہنچایا۔
بولنگ میں عرب گل نے 4 اوورز میں صرف 8 رنز دے کر 4 وکٹیں حاصل کیں، جبکہ ننگیال خروٹی نے 3 وکٹیں لیں۔ جاپان کی جانب سے ریو ساکورانو تھامس نے 23 رنز بنائے۔ افغانستان گروپ اے میں شامل ہے اور اس کا اگلا میچ 25 ستمبر کو نیپال کے خلاف شیڈول ہے۔