شمالی ایتھوپیا میں لڑائی کے پھیلاؤ کے باعث تاریخی شہر لالی بیلا کے لیے پروازیں معطل کردی گئی ہیں، جبکہ تیگرائے میں رہائشی دوبارہ بڑی جنگ کے خدشے کے پیش نظر خوراک اور نقدی جمع کر رہے ہیں۔ رائٹرز کے مطابق چار سفارت کاروں، دو مقامی رہائشیوں اور ایک علاقائی ذریعے نے لالی بیلا کے قریب لڑائی اور پروازوں کی معطلی کی تصدیق کی۔
لالی بیلا یونیسکو کے عالمی ثقافتی ورثے میں شامل اپنے قدیم چٹانی گرجا گھروں کے لیے معروف ہے اور شمالی ایتھوپیا کے اہم سفری راستوں پر واقع ہے۔ ایک سفارتی ذریعے نے رائٹرز کو بتایا کہ لڑائی شہر کے آس پاس جاری ہے، تاہم اس وقت شہر کے اندر لڑائی کی اطلاع نہیں۔
ایتھوپیا کی فوج کا کہنا ہے کہ اس نے تیگرائے فورسز کے حملے ناکام بنائے اور سینکڑوں مخالف جنگجوؤں کو ہلاک، زخمی یا گرفتار کیا۔ رائٹرز ان اعداد کی آزادانہ تصدیق نہیں کر سکا۔ دوسری جانب تیگرائے پیپلز لبریشن فرنٹ کا کہنا ہے کہ وہ وفاقی حکومت کی فوجی کارروائی کے جواب میں دفاعی جنگ لڑ رہا ہے۔
تیگرائے کے دارالحکومت میکیلے اور دیگر علاقوں میں شہریوں نے اشیائے خورونوش خریدنے اور نقدی نکالنے میں تیزی دکھائی ہے۔ اقوام متحدہ اور یورپی یونین نے فریقین سے تحمل، کشیدگی میں کمی اور افریقی یونین کی ثالثی میں ہونے والے امن عمل کی طرف واپسی کا مطالبہ کیا ہے۔