د بلوچستان د خاران مرستیال کمشنر منیر احمد سومرو نږدې دوه اوونۍ وروسته په خوندي ډول خوشې شوی دی. د بلوچستان د کورنیو چارو ادارې یوه لوړپوړي چارواکي او د هغه د کورنۍ غړي د نوموړي خوندي راستنېدل تایید کړي دي.
منیر احمد سومرو د سپتمبر په شلمه له کوټې څخه خاران ته د سفر پر مهال تښتول شوی و. د چارواکو په وینا وسله والو د خاران ولسوالۍ د لجاه په سیمه کې موټر درولی او سومرو یې له یوه ملګري، موټر چلوونکي او شخصي ساتونکي سره یوځای تښتولی و.
موټر چلوونکی او ساتونکی درې ورځې وروسته خوشې شول، خو سومرو په بند کې پاتې شو. د پولیسو او سرحدي ځواکونو له خوا د لټون عملیات پیل شول او سیمه ییز قومي مشران هم د نوموړي د خوشې کېدو په هڅو کې شامل شول.
د ډان د راپور له مخې د قومي مشرانو او وسله والو ترمنځ خبرو اترو د نوموړي په خوشې کېدو کې مرسته وکړه. د تښتوونکو د هویت او د خوشې کېدو د بشپړو شرایطو په اړه لا نور معلومات نه دي خپاره شوي.