یوکرین نے بدھ 14 اکتوبر کو امریکہ پر الزام عائد کیا کہ وہ روسی میزائل حملوں کی پیشگی اطلاع نہ دے کر اور میدان جنگ میں استعمال ہونے والے اسٹار لنک نظام میں تبدیلیاں کر کے روس کی مدد کر رہا ہے۔ فرانسیسی خبر رساں ادارے اے ایف پی کے مطابق کیف پر مسلسل دو راتوں تک بیلسٹک میزائل اس وقت گرے جب فضائی حملے کے سائرن بروقت نہیں بج سکے۔
اے ایف پی کے مطابق یوکرین کے ایک سینئر عہدیدار نے تصدیق کی کہ امریکہ نے حالیہ دنوں میں روسی میزائلوں کے لانچ سے متعلق انٹیلی جنس کی فراہمی روکنے کی دھمکی دی تھی، جو یوکرین حملوں کو ناکام بنانے کے لیے استعمال کرتا ہے۔ صدر ڈونلڈ ٹرمپ نے منگل کو ایسی کسی دھمکی کی تردید کی تھی۔ عہدیدار نے اے ایف پی سے کہا کہ امریکہ کسی وجہ سے واضح طور پر روس کی مدد کر رہا ہے۔
یوکرینی صدر ولادیمیر زیلنسکی نے برطانوی صحافی پیئرز مورگن سے گفتگو میں ایلون مسک سے اسٹار لنک بحال کرنے کی اپیل کی اور کہا کہ انہیں امید ہے یہ کوئی غلطی یا بڑا تکنیکی مسئلہ ہو گا۔ ایلون مسک نے کہا کہ یوکرین میدان جنگ میں رابطوں کے لیے جس اسٹار شیلڈ نظام پر انحصار کرتا ہے وہ امریکی حکومت کی ملکیت اور کنٹرول میں ہے اور اس کی رفتار یا استعمال پر کسی بھی پابندی کا فیصلہ امریکی فوج اور بالآخر امریکی صدر کرتے ہیں۔ یوکرین کے سابق وزیر دفاع میخائلو فیدوروف نے بعد میں کہا کہ اسٹار لنک کی سروس بحال کی جا رہی ہے۔
دوسری جانب کیف انڈیپنڈنٹ نے یوکرینی اور امریکی ذرائع کے حوالے سے رپورٹ کیا کہ انٹیلی جنس شیئرنگ بند کرنے کا کوئی فیصلہ نہیں کیا گیا۔ یوکرینی وزیر خارجہ آندری سیبیہا نے 13 اکتوبر کو کہا تھا کہ امریکہ کے ساتھ یہ تعاون جاری ہے۔ ایک سینئر یوکرینی عہدیدار کے مطابق امریکی حکام نے موقف اختیار کیا کہ وہ میزائل لانچ کا پتہ نہیں لگا سکے۔ ناروے کے دفاعی تحقیقی ادارے کے ماہر فیبیان ہوفمین نے کیف انڈیپنڈنٹ کو بتایا کہ بیلسٹک میزائلوں کی نشاندہی کرنے والے سیٹلائٹ عام طور پر انتہائی قابل اعتماد ہوتے ہیں، تاہم گھنے اور غیر معمولی طور پر بلند بادل ان کی کارکردگی متاثر کر سکتے ہیں۔
اے ایف پی کے مطابق حالیہ روسی حملوں میں ملک بھر میں 15 افراد ہلاک ہوئے جبکہ توانائی کی تنصیبات کو نقصان پہنچنے سے کیف کے بڑے حصوں میں بجلی منقطع ہو گئی۔ خارکیف میں بجلی گھروں کو بیلسٹک میزائلوں سے نشانہ بنایا گیا اور ژیتومیر، سومی اور چرنیہیو پر بھی حملے ہوئے۔ کریملن کے ترجمان دمتری پیسکوف نے کہا کہ روس صورتحال کا بغور جائزہ لے رہا ہے لیکن ابھی کوئی حتمی نتیجہ اخذ کرنا قبل از وقت ہے۔