باکو: ایکسپریس ٹریبیون کے مطابق ایشیا میں باہمی رابطے اور اعتماد سازی کے اقدامات سے متعلق کانفرنس (سیکا) کے ساتویں سربراہ اجلاس میں جمعرات کو دوپہر کے قریب جیسے ہی اسرائیلی صدر اسحاق ہرزوگ نے خطاب شروع کیا، پاکستان سمیت دس سے زیادہ ممالک کے نمائندے اجلاس کے ہال سے اٹھ کر چلے گئے۔
رپورٹ کے مطابق ترکیہ کے وزیرِ خارجہ ہاکان فیدان بھی واک آؤٹ کرنے والوں میں شامل تھے۔ اس سے قبل ستمبر میں نیویارک میں اقوامِ متحدہ کی جنرل اسمبلی کے اعلیٰ سطحی ہفتے کے دوران اسرائیلی وزیرِ اعظم بنیامین نیتن یاہو کی تقریر پر بھی اسی طرح کا واک آؤٹ دیکھا گیا تھا۔
ایک روزہ سربراہ اجلاس کی میزبانی سیکا کے موجودہ چیئرمین آذربائیجان نے کی، جس میں رکن ممالک، مبصر ممالک اور شراکت دار بین الاقوامی تنظیموں کے نمائندے شریک ہوئے۔ ایجنڈے میں علاقائی تعاون، رابطہ کاری، ڈیجیٹلائزیشن اور پائیدار ترقی شامل تھے، جبکہ اجلاس میں باکو اعلامیہ منظور کرنے اور لاؤس کی بطور نئے رکن شمولیت کا اعلان متوقع تھا۔
اپنے خطاب میں ہاکان فیدان نے کہا کہ سیکا کے رکن ممالک کو فلسطین، جو خود اس فورم کا رکن ہے، کے حقوق کی حمایت میں واضح مؤقف اپنانا ہو گا۔ انہوں نے کہا کہ دیرپا حل 1967 کی سرحدوں پر مبنی ایک آزاد اور خودمختار فلسطینی ریاست کے قیام میں ہے، جس کا دارالحکومت مشرقی یروشلم ہو۔ مزید تفصیل ایکسپریس ٹریبیون پر۔