وفاقی حکومت نے پیٹرول کی قیمت طے کرنے کے طریقہ کار میں تبدیلی کر دی ہے، جس کے تحت آئل ریفائنریز کو درآمدی قیمت اور ایکس ریفائنری قیمت کے درمیان فرق پیٹرولیم لیوی کی مد میں سرکاری خزانے میں جمع کرانا ہوگا۔ حکومت کا کہنا ہے کہ اس سے حاصل ہونے والا فائدہ صرف پیٹرول کی پرچون قیمت میں کمی کی صورت میں صارفین کو منتقل کیا جائے گا۔
پیٹرولیم ڈویژن نے یہ نوٹیفکیشن اوگرا اور ریفائنریز کو اس وقت جاری کیے جب وفاقی کابینہ نے 30 اکتوبر کو ایران امریکا جنگ کے باعث قیمتوں میں اتار چڑھاؤ سے نمٹنے کے لیے پیٹرول کے نرخوں کے فارمولے میں ترامیم کی منظوری دی۔ نئے نظام کے تحت پیٹرول کی درآمدی قیمت پی ایس او کے متعلقہ کارگو کی اصل درآمدی لاگت پر طے ہوگی، جبکہ اگلے 30 دن تک ریفائنریز کو جو ایکس ریفائنری قیمت ملے گی اس میں پریمیم، اخراجات اور کسٹمز ڈیوٹی جنگ سے پہلے، یعنی 7 مارچ 2026 کی سطح پر منجمد رہیں گے۔
ایکس ریفائنری قیمت وہ نرخ ہے جس پر ریفائنری ٹیکسوں، ڈیلرز کے کمیشن اور ترسیلی اخراجات شامل ہونے سے پہلے آئل مارکیٹنگ کمپنیوں کو پیٹرول فروخت کرتی ہے۔ ریفائنریز کو اندرون ملک پیٹرول کی یومیہ فروخت کی رپورٹ اور ادائیگیوں کی رسیدیں پیٹرولیم ڈویژن اور اوگرا کو تصدیق کے لیے جمع کرانا ہوں گی۔
ذرائع کے مطابق نئے فارمولے کا مقصد ریفائنریز کی جانب سے مانگے جانے والے زیادہ پریمیم اور کرایوں کا پورا بوجھ صارفین پر پڑنے سے روکنا ہے، جو بصورت دیگر پیٹرول کی قیمت میں بڑے اضافے کا سبب بن سکتا تھا۔ حکام کے مطابق 30 اکتوبر کو اعلان کردہ قیمتیں اسی فارمولے کے تحت طے کی گئیں۔ دوسری جانب وزیر پیٹرولیم علی پرویز ملک نے اتوار کو ایک تقریب سے خطاب میں کہا کہ ایک کروڑ 20 لاکھ سے ایک کروڑ 30 لاکھ مستحق افراد کو جنگ سے پہلے کی قیمتوں پر رعایتی پیٹرول فراہم کیا جا رہا ہے۔