افغانستان کرکٹ بورڈ نے نئی شکل میں شروع ہونے والی افغانستان پریمیئر لیگ کی پانچوں ٹیموں کے کپتانوں، ہیڈ کوچز اور مینٹورز کا اعلان کر دیا ہے۔ افغانستان کے نمایاں کھلاڑی راشد خان، عظمت اللہ عمرزئی، رحمان اللہ گرباز، رحمت شاہ اور ابراہیم زدران ٹیموں کی قیادت کریں گے، جبکہ لیگ 27 دسمبر سے شروع ہونی ہے۔
اعلان کے مطابق قندھار واریئرز کی کپتانی راشد خان کریں گے، جن کے ہیڈ کوچ روی بوپارا اور مینٹور عرفان پٹھان ہوں گے۔ پکتیا کی ٹیم میں رحمت شاہ کپتان، پاکستان کے سابق آل راؤنڈر اظہر محمود ہیڈ کوچ اور سابق فاسٹ بولر وقار یونس مینٹور ہوں گے۔ اکسل یونائیٹڈ کابل کی قیادت عمرزئی، ننگرہار کی گرباز (مینٹور مارک باؤچر) اور بلخ کی ابراہیم زدران کریں گے، جہاں مکی آرتھر ہیڈ کوچ اور تلکارتنے دلشان مینٹور ہیں۔
اگلا مرحلہ 3 نومبر کو دبئی میں ہونے والا پلیئرز ڈرافٹ ہے۔ بورڈ کے مطابق تقریباً 1500 افغان اور غیر ملکی کھلاڑیوں نے رجسٹریشن کرائی تھی، جن میں سے 462 کو ڈرافٹ پول میں رکھا گیا ہے۔ رجسٹرڈ غیر ملکی کھلاڑیوں میں پاکستان کے امام الحق، صائم ایوب، فخر زمان اور صاحبزادہ فرحان کے علاوہ وانندو ہسارنگا، شکیب الحسن، روومین پاول اور عمران طاہر بھی شامل ہیں۔
ہر ٹیم 19 کھلاڑیوں پر مشتمل ہوگی جن میں کم از کم 12 افغان کھلاڑی ہوں گے، اور کھلاڑیوں کی تنخواہوں کی حد فی ٹیم 7 لاکھ 25 ہزار ڈالر رکھی گئی ہے۔ افغانستان کرکٹ بورڈ نے 2018 میں بھی یہ لیگ شروع کی تھی مگر ادائیگیوں کے مسائل کے باعث صرف ایک سیزن ہو سکا۔ مقامات کا باضابطہ اعلان ابھی نہیں ہوا، تاہم توقع ہے کہ پہلا سیزن متحدہ عرب امارات میں کھیلا جائے گا۔