افغانستان کے مغربی صوبے ہرات میں دوا ساز کمپنی اوویسن فارما کے تین نئے پیداواری بلاکس کا 3 کروڑ ڈالر کی سرمایہ کاری سے سنگ بنیاد رکھ دیا گیا ہے، جبکہ فیکٹری میں ڈرپ (سیرم) اور انجکشن تیار کرنے والی نئی پیداواری لائن کا بھی افتتاح کر دیا گیا ہے۔
ذرائع کے مطابق نئی لائن روزانہ ایک لاکھ پیکٹ تک سیرم تیار کرنے کی صلاحیت رکھتی ہے۔ نئے بلاکس تین ہزار مربع میٹر رقبے پر تعمیر ہوں گے اور ہر عمارت پانچ منزلہ ہو گی، جنہیں بین الاقوامی معیار کے مطابق جدید مشینری سے آراستہ کیا جائے گا۔
اس توسیع سے فیکٹری کی دوا سازی کی صلاحیت میں نمایاں اضافہ متوقع ہے، جسے افغانستان کی دوا ساز صنعت کو مضبوط بنانے، مقامی پیداوار بڑھانے اور درآمدی ادویات پر انحصار کم کرنے کی سمت اہم قدم قرار دیا جا رہا ہے۔ ہرات حالیہ مہینوں میں صنعتی سرمایہ کاری کا اہم مرکز بن کر ابھرا ہے، جہاں اسی ہفتے ملک کے پہلے جدید ایلومینیم وہیل پلانٹ نے بھی پیداوار شروع کی ہے۔