د روسیې د بهرنیو چارو وزارت اعلان کړی چې د افغانستان په اړه د مسکو فارمټ د مشورو اتمه غونډه به د اکتوبر په ۵مه په مسکو کې ترسره شي.
د روسیې د بهرنیو چارو وزارت ویاندې ماریا زاخارووا ویلي چې د افغانستان، روسیې، پاکستان، چین، ایران، هند، قزاقستان، قرغزستان، تاجکستان او ازبکستان ځانګړي استازي او لوړپوړي چارواکي به په غونډه کې ګډون وکړي. بلاروس او مصر هم د مېلمه هېوادونو په توګه بلل شوي دي.
د افغان پلاوي مشري به د بهرنیو چارو وزیر امیر خان متقي کوي. د روسیې د بهرنیو چارو وزیر سرګي لاوروف به غونډې ته وینا وکړي او متقي به ورسره د غونډې په څنډه کې جلا دوه اړخیزه لیدنه هم ولري.
د روسیې د بهرنیو چارو وزارت په وینا، په دوه اړخیزه لیدنه کې به د افغانستان او روسیې ترمنځ د همکارۍ اوسني موضوعات وڅېړل شي.
په اصلي غونډه کې به د افغانستان او سیمې د هېوادونو ترمنځ سیاسي او اقتصادي همکاري، د ترهګرۍ پر ضد سیمه ییزه همکاري او د نشه يي توکو د ناقانونه قاچاق مخنیوی تر بحث لاندې ونیول شي. تمه ده چې د غونډې په پای کې ګډه اعلامیه هم خپره شي.