کمبوڈیا کو آن لائن فراڈ نیٹ ورکس کی محفوظ پناہ گاہ نہیں بننے دیں گے، وزیراعظم ہن مانیت

کمبوڈیا کے وزیراعظم ہن مانیت نے کہا ہے کہ ان کا ملک بین الاقوامی آن لائن فراڈ نیٹ ورکس کے لیے محفوظ پناہ گاہ نہیں بنے گا۔ انہوں نے یہ بیان نوم پنہ میں آن لائن فراڈ کے خلاف بین الاقوامی کانفرنس کے افتتاح پر دیا، جہاں امریکا، چین اور دیگر ممالک سمیت ایک درجن سے زیادہ ملکوں کے نمائندے شریک ہوئے۔ وزیراعظم نے کہا کہ مجرمانہ نیٹ ورکس کو ملک کی ترقی اور شہریوں کے روزگار کو نقصان پہنچانے کی اجازت نہیں دی جائے گی۔ انہوں نے سرحد پار سائبر فراڈ کے خلاف زیادہ بین الاقوامی تعاون اور معلومات کے فوری تبادلے کی حمایت کی۔ جنوب مشرقی ایشیا میں بڑے پیمانے پر چلنے والے آن لائن فراڈ مراکز، انسانی اسمگلنگ اور مالی دھوکا دہی کے نیٹ ورکس حالیہ برسوں میں علاقائی سکیورٹی اور قانون نافذ کرنے والے اداروں کے لیے بڑا مسئلہ بنے ہیں۔ کانفرنس میں حکومتوں، قانون نافذ کرنے والے اداروں، مالیاتی اداروں اور ٹیکنالوجی کمپنیوں کے نمائندے شریک ہیں۔