پاکستان میں ڈیجیٹل رابطے کے لیے یو ایس ایف کا 32.90 ارب روپے کا بجٹ منظور

یونیورسل سروس فنڈ کی پالیسی کمیٹی نے مالی سال 2026-27 کے لیے 32.90 ارب روپے کے بجٹ کی منظوری دے دی ہے، جس کا مقصد ملک کے ایسے علاقوں میں براڈبینڈ اور ٹیلی کام سہولت بڑھانا ہے جہاں رابطے کی سہولیات ناکافی ہیں۔ کمیٹی کی صدارت وفاقی وزیر برائے انفارمیشن ٹیکنالوجی شزا فاطمہ خواجہ نے کی۔ منظور شدہ بجٹ میں 24.89 ارب روپے جاری منصوبوں کے لیے جبکہ 6.56 ارب روپے نئی اسکیموں کے لیے مختص کیے گئے ہیں۔ پہلی سہ ماہی کے لیے 5.57 ارب روپے جاری کرنے کی منظوری بھی دی گئی ہے۔ اس وقت 28 منصوبے زیرِ عمل ہیں، جن میں 17 موبائل براڈبینڈ اور 11 آپٹیکل فائبر نیٹ ورک منصوبے شامل ہیں۔ نئے پروگرام میں مزید نو موبائل براڈبینڈ اور چار آپٹیکل فائبر منصوبوں کی منظوری دی گئی ہے۔ سرکاری تفصیلات کے مطابق سرمایہ کاری کا ہدف دور دراز اور کم سہولت والے علاقوں تک ڈیجیٹل رابطہ، انٹرنیٹ اور ٹیلی کمیونی کیشن خدمات کی رسائی بڑھانا ہے۔