څلور پاکستانی ملاحان چې د سومالي سمندري غلو له خوا د تښتول شوي تېلو ټانکر کې له پنځو میاشتو ډېر بندیان وو، کراچۍ ته ستانه شوي دي. د درې نورو پاکستانی عملې غړو جسدونه هم هېواد ته انتقال شوي دي.
ډان او عرب نیوز ویلي یاسر خان، عقیل خان، امین بن شمس او عثمان غني ټپیان وو او د ایتوپین هوايي شرکت په الوتکه کې کراچۍ ته ورسېدل. هغوی د طبي درملنې لپاره روغتون ته انتقال شول.
د رفیع الله خان، سید کاشف عمر او محمود احمد انصاري جسدونه هم پاکستان ته راوړل شول. راپورونه وايي هغوی د بند پر مهال مړه شوي وو.
درې نور پاکستانی ملاحان لا هم په اړوند کښتۍ کې پاتې دي او د شرکت د اجازې او اداري ترتیباتو وروسته به د هغوی د ستنېدو هڅه وشي.