ایکسپریس ٹریبیون کے مطابق بین الاقوامی مالیاتی فنڈ (آئی ایم ایف) کے جمعرات کو سامنے آنے والے تخمینوں میں کہا گیا ہے کہ بھارت 2027 تک جاپان کو پیچھے چھوڑ کر برائے نام جی ڈی پی کے لحاظ سے دنیا کی چوتھی بڑی معیشت بن جائے گا۔
آئی ایم ایف کے مطابق رواں سال جاپان چوتھے نمبر پر برقرار رہے گا، تاہم 2027 میں بھارت کی جی ڈی پی 4.52 ٹریلین ڈالر تک پہنچنے کے ساتھ یہ جگہ اس کے پاس آ جائے گی۔ اس سال جاپان بھارت اور برطانیہ دونوں سے پیچھے ہو کر چھٹے نمبر پر آ جائے گا۔ امریکا بدستور دنیا کی سب سے بڑی معیشت ہے، جس کے بعد چین اور جرمنی ہیں۔
آئی ایم ایف نے رواں ہفتے بھارت کی 2026 کی شرحِ نمو کا تخمینہ بڑھا کر 7 فیصد کر دیا ہے۔ ایشیا پیسیفک کے لیے علاقائی اقتصادی جائزہ جاری کرتے ہوئے آئی ایم ایف کے ایشیا ڈائریکٹر کرشنا سری نواسن نے کہا کہ ایران پر امریکا اور اسرائیل کی جنگ سے پیدا ہونے والے توانائی کی قیمتوں کے جھٹکے کے وقت بھارت کی معاشی بنیادیں مضبوط تھیں، شرحِ نمو اچھی تھی، مالی نظم و ضبط موجود تھا اور ذخائر وافر تھے۔
اس کے برعکس 2026 میں جاپان کی شرحِ نمو 0.7 فیصد تک گرنے کا تخمینہ ہے۔ رپورٹ کے مطابق توانائی کی بڑھتی قیمتوں، مہنگائی، 40 برس کی کم ترین سطح تک گرنے والے ین اور عمر رسیدہ آبادی نے جاپانی معیشت پر دباؤ ڈالا ہے، جبکہ بینک آف جاپان شرحِ سود کو تین دہائیوں کی بلند ترین سطح پر لے جا چکا ہے۔ جمعرات کو ٹوکیو کا نکی انڈیکس ٹیکنالوجی شیئرز میں گراوٹ کے باعث تقریباً 5 فیصد گر گیا۔ مزید تفصیل ایکسپریس ٹریبیون پر۔