خیبر پختونخوا کے ضلع لوئر جنوبی وزیرستان کے صدر مقام وانا میں نامعلوم مسلح افراد نے ڈازہ غونڈی چوک پر فائرنگ کر کے ایک پولیس کانسٹیبل کو قتل کر دیا۔
ذرائع کے مطابق ابتدائی اطلاعات میں مقتول اہلکار کی شناخت غلام حسین ولد میتا خان کے نام سے ہوئی ہے جو تحصیل وانا کے علاقے غواخوا کے رہائشی تھے۔ واقعے کے بعد ان کی لاش ڈسٹرکٹ ہیڈ کوارٹر ہسپتال وانا منتقل کر دی گئی۔
حملہ آوروں کی شناخت یا واقعے کے محرکات کے بارے میں مزید تفصیلات سامنے نہیں آئیں، اور کسی گروہ کی جانب سے ذمہ داری قبول کرنے کی اطلاع بھی نہیں ملی۔ جنوبی وزیرستان سمیت خیبر پختونخوا کے جنوبی اضلاع میں حالیہ مہینوں کے دوران پولیس اور سکیورٹی اہلکاروں پر حملوں کے واقعات میں اضافہ دیکھا گیا ہے۔