افغانستان کی طالبان حکومت نے امریکا سے مطالبہ کیا ہے کہ وہ افغان تارکینِ وطن کو واپس بھیجتے وقت ذمہ داری اور احتیاط کا مظاہرہ کرے۔ افغان وزارتِ خارجہ نے پیر کو جاری بیان میں کہا کہ دنیا میں جہاں کہیں بھی افغان شہری ہوں، ان کے ساتھ قانون، مسلمہ اصولوں اور انسانی وقار کے مطابق سلوک ہونا چاہیے۔
بیان کے مطابق ایسے فیصلے دو طرفہ مفاہمت، ضروری رابطہ کاری اور متعلقہ افراد کے حقوق کو مدِنظر رکھ کر کیے جائیں۔ وزارت نے کہا کہ افغان فریق موجودہ حقائق کو سمجھتے ہوئے اور دونوں جانب کے جائز مفادات کا خیال رکھتے ہوئے اس معاملے پر باہمی افہام و تفہیم کی بنیاد پر تعمیری بات چیت کے لیے تیار ہے۔
افغان بیان میں یہ بھی کہا گیا کہ تیسرے ممالک کو کسی دوسرے ملک کے شہریوں کو محدود اور عارضی رعایتوں کے بدلے سودے بازی کا ذریعہ نہیں بنانا چاہیے۔
ذرائع کے مطابق صدر ڈونلڈ ٹرمپ کی انتظامیہ 150 سے زائد افغان تارکینِ وطن کو ملک بدر کرنے کا ارادہ رکھتی ہے اور پہلی پرواز جلد روانہ ہو سکتی ہے۔ چونکہ واشنگٹن کے طالبان حکومت کے ساتھ سفارتی تعلقات نہیں، اس لیے یہ ملک بدری پاکستان کے راستے کی جائے گی۔ امریکی سابق فوجیوں اور حقوق کے گروپوں کا کہنا ہے کہ ان میں ایسے افراد کے رشتہ دار بھی شامل ہو سکتے ہیں جنہوں نے 2021 کے انخلا سے پہلے امریکی افواج کے ساتھ کام کیا تھا۔