امریکا نے یوکرین کو 500 پیٹریاٹ میزائل فروخت کرنے کی منظوری دے دی ہے، جن کی یوکرین کو روس کے بڑھتے فضائی حملوں سے بچاؤ کے لیے شدید ضرورت ہے۔ امریکی محکمہ خارجہ کے مطابق جدید پی اے سی تھری انٹرسیپٹر میزائلوں کی مالیت 2.1 ارب ڈالر ہے، اور یہ رقم یوکرین کے یورپی اتحادی اور کینیڈا ادا کریں گے۔
تاہم یوکرینی صدر ولودیمیر زیلنسکی نے کہا ہے کہ ان میزائلوں کی فراہمی میں کئی سال لگ سکتے ہیں۔ انہوں نے امریکا پر زور دیا کہ ترسیل کا عمل تیز کیا جائے۔
زیلنسکی کے مطابق روس کے تباہ کن بیلسٹک میزائلوں کو فضا میں روکنے کا یہی واحد مؤثر ذریعہ ہے۔ یہ منظوری ایسے وقت آئی ہے جب روس یوکرین کے بجلی کے نظام اور ریلوے سمیت شہری تنصیبات پر ڈرون اور میزائل حملے تیز کر چکا ہے۔