افغانستان کے اقتصادی کمیشن نے غیر ملکی سرمایہ کاروں کو راغب کرنے اور ملک کی معاشی ترقی کو تیز کرنے کے لیے نئی غیر ملکی سرمایہ کاری پالیسی کی منظوری دے دی ہے۔ یہ فیصلہ پیر کو کابل کے ایوانِ مرمر میں نائب وزیر اعظم برائے اقتصادی امور ملا عبدالغنی برادر کی صدارت میں ہونے والے کمیشن کے باقاعدہ اجلاس میں کیا گیا۔
نائب وزیر اعظم کے دفتر کے مطابق یہ پالیسی اقتصادی معاونت کے دفتر کی سربراہی میں قائم ایک کمیٹی نے تیار کی تھی، جسے تفصیلی جائزے اور کمیشن کی سفارشات شامل کرنے کے بعد منظور کیا گیا۔ پالیسی کا مقصد غیر ملکی سرمایہ کاری کو باقاعدہ بنانا، طریقہ کار آسان کرنا، سرمایہ کاروں کے لیے سازگار ماحول اور سرمایہ کاری کا تحفظ یقینی بنانا ہے۔
اجلاس میں کمیشن نے ملک کے کسٹم دفاتر میں درآمدی تجارتی کمپنیوں سے مقررہ ٹیکس وصول کرنے کی ایک تجویز بھی منظور کی۔ حکام کے مطابق اس اقدام سے درآمد کنندگان کو مزید سہولتیں ملیں گی اور طریقہ کار سادہ ہو جائے گا۔
دونوں فیصلے حتمی منظوری کے لیے امارت اسلامیہ کے امیر کے دفتر کو بھجوا دیے گئے ہیں۔