وزیراعظم شہباز شریف اقوام متحدہ کی موسمیاتی تبدیلی کانفرنس (کوپ 31) کے لیڈرز سمٹ میں شرکت کے لیے منگل کو تین روزہ دورے پر ترکیہ کے شہر انطالیہ پہنچ گئے۔
وزیراعظم ہاؤس کے مطابق انطالیہ آمد پر ترکیہ کے نائب وزیر ثقافت و سیاحت گوکھان یازگی، نامزد پاکستانی سفیر آمنہ بلوچ اور سینیئر ترک حکام نے ان کا استقبال کیا۔ وزیراعظم کے ہمراہ سابق وزیر موسمیات سینیٹر شیری رحمان، وفاقی وزیر اطلاعات عطا اللہ تارڑ اور مشیر طارق فاطمی بھی ہیں۔
وزیراعظم سمٹ سے خطاب میں پاکستان کی موسمیاتی ترجیحات اجاگر کریں گے اور عالمی سطح پر موسمیاتی اقدامات اور بین الاقوامی تعاون بڑھانے پر زور دیں گے۔ وہ صاف توانائی اور بجلی کے استعمال پر کوپ 31 کی صدارت کے زیر اہتمام اعلیٰ سطحی مکالمے سے بھی خطاب کریں گے۔
دفتر خارجہ کے مطابق شہباز شریف شمسی توانائی کے تیز رفتار فروغ، قابل تجدید توانائی کی گنجائش میں اضافے اور آفات سے نمٹنے کی تیاری اور قبل از وقت انتباہ کے نظام کو مضبوط بنانے کے لیے پاکستان کے اقدامات بیان کریں گے۔ وہ ترقی پذیر ممالک کے لیے قابل پیشگوئی، مناسب اور آسانی سے دستیاب موسمیاتی فنڈز کا مطالبہ بھی کریں گے۔
کانفرنس کے مقام پر ایک پاکستان پویلین بھی قائم کیا گیا ہے جہاں مختلف موضوعات پر 54 تقریبات ہوں گی۔ سمٹ کے موقع پر وزیراعظم کی ترک صدر رجب طیب اردوان اور دیگر عالمی رہنماؤں سے ملاقاتیں بھی متوقع ہیں۔