کالعدم تحریک طالبان پاکستان (ٹی ٹی پی) نے دعویٰ کیا ہے کہ اس نے 9 اور 10 نومبر کو خیبر پختونخوا کے چار اضلاع ڈیرہ اسماعیل خان، اورکزئی، شمالی وزیرستان اور جنوبی وزیرستان میں سیکیورٹی فورسز کو چھ حملوں میں نشانہ بنایا۔ ذرائع کے مطابق گروپ نے ان حملوں میں چار اہلکاروں کی ہلاکت اور کئی چوکیوں پر نگرانی اور مواصلاتی آلات کو نقصان پہنچانے کا دعویٰ کیا ہے۔
ان دعوؤں کی آزادانہ تصدیق نہیں ہو سکی اور ان مخصوص واقعات پر پاک فوج یا آئی ایس پی آر کا کوئی مؤقف تاحال سامنے نہیں آیا۔
گروپ کے بیانات کے مطابق ڈیرہ اسماعیل خان شہر میں ایک سیکیورٹی چوکی پر حملے میں دو نگرانی کیمرے اور ایک سیٹلائٹ ڈش متاثر ہوئی، جبکہ اورکزئی کے علاقے کلایہ کے مشتی میں ایک فوجی چوکی پر سنائپر حملے میں ایک اہلکار کی ہلاکت کا دعویٰ کیا گیا۔ شمالی وزیرستان کی تحصیل شیوہ کے علاقے درازندہ عالم خیل میں ایک چوکی پر حملے کا ذکر بھی کیا گیا، تاہم اس میں کسی واضح جانی نقصان کی تفصیل نہیں دی گئی۔
جنوبی وزیرستان میں گروپ نے تین الگ کارروائیوں کا دعویٰ کیا ہے، جن میں بدر کے علاقے کٹوری سر کی ایک چوکی کا مواصلاتی نظام متاثر کرنے، توئی خلہ کے علاقے شیرکانی میں ایک قلعے کے قریب دو اہلکاروں اور کٹوری سر میں ایک اور اہلکار کی ہلاکت کی بات کی گئی ہے۔
یہ دعوے ایسے وقت سامنے آئے ہیں جب خیبر پختونخوا کے جنوبی اضلاع میں سیکیورٹی فورسز پر حملوں کا سلسلہ جاری ہے اور شمالی وزیرستان میں جاری آپریشن کے باعث کئی علاقوں میں کرفیو نافذ ہے۔