وزیر اعظم شہباز شریف نے آٹوز اینڈ آٹو پارٹس مینوفیکچرنگ پالیسی 2026-31 کی منظوری دے دی ہے، جس کا مقصد گاڑیوں کی صنعت کو درآمدی پرزوں پر چلنے والی اسمبلی سے نکال کر برآمدات پر مبنی مقامی مینوفیکچرنگ کی طرف لانا ہے۔ ذرائع کے مطابق پالیسی کا مسودہ بین الاقوامی مالیاتی فنڈ (آئی ایم ایف) کو دکھایا گیا تھا جس نے اس پر کوئی اعتراض نہیں کیا۔
ذرائع کے مطابق وفاقی کابینہ کی منظوری کے بعد حکومت پارلیمان میں ایک منی بل پیش کرے گی جسے منی بجٹ کہا جا رہا ہے۔ وزیر اعظم کے مشیر برائے صنعت و پیداوار ہارون اختر خان کا کہنا ہے کہ یہ پالیسی ایک جامع تبدیلی ہے جو مقامی صنعت کاروں کو مضبوط کرے گی، روزگار پیدا کرے گی اور پاکستانی صنعت کو عالمی آٹوموٹو سپلائی چین سے جوڑے گی۔
مقامی پرزہ سازی لازمی
پالیسی کے تحت گاڑیاں بنانے والی موجودہ کمپنیوں کو ہر سال اپنی مقامی ویلیو ایڈیشن میں 2 فیصد اضافہ کرنا ہوگا، جو پالیسی کی مدت میں مجموعی طور پر 8 فیصد بنتا ہے۔ 2030-31 تک کم از کم ہدف کاروں اور ایس یو ویز کے لیے 40 فیصد، ہلکی کمرشل گاڑیوں کے لیے 45 فیصد، ٹریکٹروں کے لیے 80 فیصد اور موٹر سائیکلوں و رکشوں کے لیے 90 فیصد مقرر کیا گیا ہے۔ نئی توانائی والی گاڑیوں کے لیے یہ ہدف بالترتیب 25 اور 30 فیصد ہوگا۔
ہدف پورا نہ کرنے والی کمپنیوں کو اگلے مالی سال میں غیر مقامی سی کے ڈی درآمدات پر 3 فیصد اضافی کسٹمز ڈیوٹی دینا ہوگی۔ ملک میں اس وقت تقریباً 2,200 آٹو پارٹس ساز ادارے ہیں، جن کی جدید کاری کے لیے انجینئرنگ ڈیولپمنٹ بورڈ اور سمیڈا کے ذریعے 2.1 ارب روپے کا وینڈر اپ گریڈیشن اور ٹیکنالوجی ٹرانسفر پروگرام شروع کیا جائے گا۔
برآمدی اہداف اور جرمانے
پالیسی میں 2026 سے 2031 تک مجموعی طور پر تقریباً 6.01 ارب ڈالر کی برآمدات کا ہدف رکھا گیا ہے، جن میں 3.29 ارب ڈالر پرزہ ساز اداروں اور 2.72 ارب ڈالر گاڑیاں بنانے والی کمپنیوں سے متوقع ہیں۔ برآمد کنندگان کو خالص ایف او بی مالیت پر 5 فیصد اور اضافی برآمدات پر مزید 10 فیصد معاونت دی جائے گی۔
خلاف ورزی کرنے والی کمپنیوں پر سالانہ فیکٹری سیلز کے 1 سے 3 فیصد تک جرمانہ ہوگا، جبکہ مسلسل دو سال ناکامی کی صورت میں، فورس میجر کے سوا، ان کا مینوفیکچرنگ سرٹیفکیٹ منسوخ کیا جا سکتا ہے۔