کراچی — مارگلہ نیوز: انسدادِ دہشت گردی کی عدالت نے نقیب اللہ محسود قتل کیس میں مزید سات پولیس اہلکاروں کو عدم شواہد کی بنیاد پر بری کردیا ہے۔
بری ہونے والے ملزمان میں گدا حسین، سید صداقت حسین، ریاض احمد، راجہ شمیم مختار، امان اللہ مروت، محمد شعیب عرف شوٹر اور محسن عباس شامل ہیں۔
پراسیکیوشن کے مطابق اس مقدمے میں سابق ایس ایس پی ملیر راؤ انوار سمیت 18 پولیس افسران اور اہلکار پہلے ہی بری ہوچکے تھے۔ تازہ فیصلے کے بعد مقدمے میں بری ہونے والے ملزمان کی مجموعی تعداد 25 ہوگئی ہے۔
عدالتی ریکارڈ کے مطابق یہ سات ملزمان پہلے مفرور قرار دیے گئے تھے اور 2023 میں دیگر ملزمان کی بریت کے فیصلے کے بعد انہوں نے خود کو عدالت کے سامنے پیش کیا تھا۔
نقیب اللہ محسود کو جنوری 2018 میں کراچی کے شاہ لطیف ٹاؤن کے علاقے میں ایک مبینہ پولیس مقابلے میں قتل کیا گیا تھا۔ بعد کی تحقیقاتی رپورٹ میں مقابلے کو جعلی قرار دیا گیا، جس کے بعد راؤ انوار سمیت متعدد پولیس افسران اور اہلکاروں کے خلاف مقدمہ چلایا گیا۔
جنوری 2023 میں انسدادِ دہشت گردی عدالت نے راؤ انوار اور دیگر 17 ملزمان کو یہ کہتے ہوئے بری کردیا تھا کہ استغاثہ الزامات ثابت کرنے میں ناکام رہا۔
تازہ فیصلے میں بھی عدالت نے باقی سات ملزمان کو عدم شواہد کی بنیاد پر بری کردیا۔