پی آئی اے کے بیڑے کی جدید کاری پر بوئنگ سے مذاکرات، نئی طیارہ تجویز پیش کرنے کی تیاری

وفاقی وزیر خزانہ محمد اورنگزیب نے نیویارک میں بوئنگ گلوبل کے صدر ڈاکٹر برینڈن نیلسن سے ملاقات کی، جس میں پاکستان انٹرنیشنل ایئرلائنز کے فضائی بیڑے کی جدید کاری اور پاکستان کے ہوابازی شعبے میں تعاون پر تبادلہ خیال کیا گیا۔ سرکاری بیان کے مطابق بوئنگ نے پی آئی اے کو نئے طیاروں کی خریداری کے لیے نظرثانی شدہ تجویز فراہم کرنے کی تصدیق کی ہے۔ ملاقات میں جلد ترسیل کے ممکنہ مواقع اور عبوری طور پر طیارے لیز پر لینے کے انتظامات بھی زیرِ بحث آئے۔ فریقین نے امریکی ایکسپورٹ امپورٹ بینک سے ممکنہ مالی معاونت، انجنوں کی خریداری، اسپیئر پارٹس، دیکھ بھال اور گراؤنڈ کیے گئے طیاروں کی بحالی کے معاملات پر بھی گفتگو کی۔ وزیر خزانہ نے پی آئی اے کی نجکاری اور بڑے ہوائی اڈوں کے انتظام کو آؤٹ سورس کرنے کے منصوبوں سے آگاہ کیا۔ ملاقات میں پاکستان اور امریکا کے درمیان براہِ راست پروازوں کی بحالی اور ہوابازی کی حفاظتی استعداد بڑھانے کے امکانات بھی زیرِ بحث آئے۔