الیکشن کمیشن آف پاکستان (ای سی پی) نے انتخابی مہم میں مصنوعی ذہانت (اے آئی) کے ذریعے ووٹرز کو گمراہ کرنے پر سخت پابندیوں کی تجویز دی ہے۔ سیاسی جماعتوں کے ضابطۂ اخلاق میں مجوزہ ترامیم کے تحت جماعتیں، امیدوار، الیکشن ایجنٹ اور ان کے حامی ایسا اے آئی سے تیار یا تبدیل شدہ مواد نہیں بنا یا پھیلا سکیں گے جو کسی شخص کے الفاظ، عمل یا شکل کو غلط انداز میں پیش کرے۔
مجوزہ قواعد کے مطابق اے آئی کی مدد سے بنائی گئی یا نمایاں طور پر تبدیل کی گئی ہر انتخابی تصویر، ویڈیو، آڈیو یا مصنوعی آواز پر واضح اور نمایاں طور پر لکھنا ہوگا کہ یہ اے آئی سے تیار کی گئی ہے۔ امیدواروں، پارٹی رہنماؤں، الیکشن حکام، عدلیہ، مسلح افواج اور دیگر سرکاری عہدیداروں کی جھوٹی یا توہین آمیز ڈیپ فیک تصاویر، آوازیں یا بیانات بنانے پر مکمل پابندی ہوگی۔
جماعتیں اور امیدوار اے آئی بوٹس اور خودکار اکاؤنٹس کے ذریعے جعلی ٹرینڈز، لائکس، شیئرز یا فالوورز بنا کر عوامی حمایت کا غلط تاثر بھی نہیں دے سکیں گے۔ روبو کالز یا کلون شدہ آواز والے پیغامات کے آغاز میں بتانا لازمی ہوگا کہ یہ اے آئی سے تیار کیے گئے ہیں، اور انتخابی مدت کا تمام اے آئی مواد ریکارڈ میں رکھ کر طلب کرنے پر کمیشن کو فراہم کرنا ہوگا۔
میڈیا اور مبصرین بھی دائرے میں
مجوزہ ضابطے اخبارات، ٹی وی چینلز، ڈیجیٹل میڈیا، صحافیوں اور سوشل میڈیا انفلوئنسرز پر بھی لاگو ہوں گے، جنہیں انتخابات سے متعلق اے آئی یا تبدیل شدہ مواد واضح طور پر لیبل کرنا ہوگا۔ پیمرا، سوشل میڈیا پروٹیکشن ریگولیٹری اتھارٹی اور نیشنل سائبر کرائم انویسٹی گیشن ایجنسی بغیر لیبل کے اے آئی مواد کی نگرانی کر کے کمیشن کو رپورٹ دیں گی۔ انتخابی مبصرین کو بھی ایسے مواد کی فوری اطلاع دینی ہوگی اور وہ اپنی رپورٹس میں اے آئی کے ذریعے ردوبدل نہیں کر سکیں گے۔
الیکشن کمیشن کا کہنا ہے کہ دیانتدارانہ، منصفانہ اور شفاف انتخابات یقینی بنانا اس کی آئینی ذمہ داری ہے۔ مجوزہ ترامیم کمیشن کی ویب سائٹ پر جاری کر دی گئی ہیں اور متعلقہ فریقین 20 نومبر 2026 تک اسلام آباد میں ای سی پی سیکریٹریٹ کو اپنی تجاویز بھیج سکتے ہیں۔