فیصل آباد کے اقبال اسٹیڈیم میں پیر 26 اکتوبر کو کھیلے گئے نیشنل ویمنز ٹی20 ٹورنامنٹ کے سنسنی خیز فائنل میں اسٹرائیکرز نے اسٹارز کو صرف ایک رن سے شکست دے کر ٹائٹل اپنے نام کر لیا۔ اسٹرائیکرز نے 115 رنز کے معمولی ہدف کا کامیابی سے دفاع کیا اور اسٹارز کی ٹیم 20 اوورز میں 8 وکٹوں پر 114 رنز ہی بنا سکی۔
آخری اوور میں اسٹارز کو 11 رنز درکار تھے۔ ڈیانا بیگ نے پہلی گیند پر چوکا لگا کر امید جگائی، مگر فاسٹ بولر سیدہ معصومہ زہرا نے حواس قابو میں رکھتے ہوئے باقی گیندوں پر رنز روک کر اپنی ٹیم کو فتح دلا دی۔ اسٹارز کی جانب سے ٹورنامنٹ کی سب سے کامیاب بیٹر صدف شمس نے 38 گیندوں پر 37 رنز بنائے، جبکہ ڈیانا بیگ 16 رنز پر ناٹ آؤٹ رہیں۔
اسٹرائیکرز کی جیت میں آف اسپنر رامین شمیم کا کردار فیصلہ کن رہا، جنہوں نے چار اوورز میں صرف 9 رنز دے کر 2 وکٹیں لیں اور میچ کی بہترین کھلاڑی قرار پائیں۔ امیمہ سہیل نے بھی 11 رنز کے عوض 2 وکٹیں حاصل کیں۔
اس سے قبل ٹاس جیت کر بیٹنگ کرنے والی اسٹرائیکرز کی ٹیم 58 رنز پر 5 وکٹیں گنوا بیٹھی تھی، تاہم کپتان نتالیہ پرویز کے 30 رنز کی بدولت ٹیم 19 اوورز میں 115 رنز بنا سکی۔ اسٹارز کی حفصہ خالد نے 29 رنز دے کر 4 وکٹیں حاصل کیں۔
یوں اسٹرائیکرز نے ٹورنامنٹ میں اپنے تمام نو میچ جیت کر ناقابلِ شکست رہتے ہوئے ٹرافی اٹھائی اور 15 لاکھ روپے انعام حاصل کیا، جبکہ رنر اپ اسٹارز کو 10 لاکھ روپے ملے۔ انوینسیبلز کی سیدہ عروب شاہ 134 رنز اور 10 وکٹوں کے ساتھ ٹورنامنٹ کی بہترین کھلاڑی قرار پائیں، صدف شمس 285 رنز کے ساتھ ٹاپ اسکورر اور رامین شمیم 19 وکٹوں کے ساتھ سب سے کامیاب بولر رہیں۔