یورپ میں منگل کو سات مسافر طیاروں کو مشتبہ بم دھمکیاں ملنے کے بعد ہنگامی بنیادوں پر ان کی تلاشی لی گئی، جن میں سے دو پروازیں برطانیہ سے روانہ ہوئی تھیں۔ حکام کے مطابق اٹلی، پولینڈ، اسپین اور بلغاریہ میں اتارے گئے ان طیاروں سے اب تک کوئی دھماکا خیز مواد برآمد نہیں ہوا۔
ذرائع کے مطابق ڈبلن اور لزبن سے آنے والی رائن ایئر کی دو پروازوں کو گمنام اطلاعات کے بعد روم کے فیومیچینو ہوائی اڈے پر اترنے کے بعد چیک کیا گیا۔ ڈبلن سے آنے والی پرواز کو اترنے تک اطالوی فضائیہ کے طیاروں نے حفاظتی حصار میں رکھا۔ بم ناکارہ بنانے والے پولیس ماہرین نے مسافروں، سامان اور طیاروں کی مکمل جانچ کی، جس کے بعد الرٹ ختم کر دیا گیا۔
جنوبی اسپین کے شہر مرسیا میں مانچسٹر سے آنے والی رائن ایئر کی ایک پرواز بھی تلاشی کے بعد کلیئر قرار دی گئی، جبکہ پولینڈ کے دارالحکومت وارسا جانے والی دو پروازیں بھی متاثر ہوئیں، جن میں لندن کے ہیتھرو سے آنے والا ایک طیارہ شامل تھا۔
سرکاری طور پر ان واقعات کو آپس میں جوڑا نہیں گیا، تاہم مختلف ممالک کے حکام مل کر جائزہ لے رہے ہیں کہ کیا یہ فضائی آمد و رفت میں خلل ڈالنے کے لیے کوئی منظم کارروائی تھی۔ برطانوی حکومت نے ان دھمکیوں کو ’بدنیتی پر مبنی جھوٹی دھمکیاں‘ قرار دیتے ہوئے کہا کہ ملک کا فضائی سکیورٹی نظام ایسے خطرات سے نمٹنے کے لیے پوری طرح تیار ہے۔
ایک مسافر خاتون نے بتایا کہ دورانِ پرواز انہیں کچھ نہیں بتایا گیا اور طیارہ اترتے ہی فائر بریگیڈ، پولیس اور بم اسکواڈ نے اسے گھیر لیا، جس کے بعد مسافروں کو سامان چھوڑ کر باہر نکال دیا گیا۔