وزیراعظم شہباز شریف نے جمعرات کو اسلام آباد میں پولیو کے خاتمے سے متعلق جائزہ اجلاس کی صدارت کرتے ہوئے ہدایت کی ہے کہ چاروں صوبوں کی مشاورت سے ایک ہفتے کے اندر ایک جامع اور مربوط حکمت عملی تیار کی جائے۔ اسی روز خیبر پختونخوا کے ضلع خیبر سے پولیو کا ایک نیا کیس سامنے آیا جس کے بعد 2026 میں ملک بھر میں کیسز کی تعداد نو تک پہنچ گئی ہے۔
وزیراعظم نے کہا کہ پولیو سے پاک پاکستان ایک بڑا چیلنج ضرور ہے، مگر قوم کا عزم اس چیلنج سے کہیں زیادہ مضبوط ہے۔ انہوں نے وفاقی وزیر صحت، وزیر مملکت، وفاقی سیکریٹری صحت اور انسداد پولیو ٹیم کو فوری طور پر چاروں صوبوں کا دورہ کرنے اور وزرائے اعلیٰ اور چیف سیکریٹریز سے ملاقاتیں کرنے کی ہدایت بھی کی۔
اجلاس کو بتایا گیا کہ رواں سال کے نو میں سے سات کیس خیبر پختونخوا سے رپورٹ ہوئے ہیں، جن میں خیبر اور بنوں سے تین تین اور شمالی وزیرستان سے ایک کیس شامل ہے۔ باقی دو کیس سندھ کے اضلاع کراچی ایسٹ اور سجاول سے سامنے آئے۔ حکام کے مطابق خیبر کے تینوں کیسوں کا وائرس جینیاتی طور پر سرحد پار سے آنے والے وائرس سے جڑا ہے۔
اجلاس میں یہ بھی بتایا گیا کہ پنجاب میں فروری 2025 کے بعد کوئی نیا کیس رپورٹ نہیں ہوا، بلوچستان میں 2025 اور 2026 میں کوئی کیس سامنے نہیں آیا، جبکہ آزاد کشمیر اور گلگت بلتستان پہلے ہی پولیو سے پاک ہیں۔ ماحولیاتی نمونوں میں پولیو وائرس کی نشاندہی میں کمی کو بھی ایک حوصلہ افزا اشارہ قرار دیا گیا۔