مالی سال 2026-27 کی پہلی سہ ماہی (جولائی تا ستمبر) میں پاکستان کی شمالی امریکہ کو اشیا کی برآمدات 4.65 فیصد اضافے کے ساتھ ایک ارب 82 کروڑ 60 لاکھ ڈالر تک پہنچ گئیں، جو گزشتہ سال اسی عرصے میں ایک ارب 74 کروڑ 50 لاکھ ڈالر تھیں، جبکہ اسی خطے سے درآمدات 60.58 فیصد بڑھ کر 84 کروڑ 13 لاکھ ڈالر ہو گئیں۔
اسٹیٹ بینک آف پاکستان کے اعداد و شمار کے مطابق امریکہ کو برآمدات 4.44 فیصد بڑھ کر ایک ارب 71 کروڑ 60 لاکھ ڈالر رہیں، جبکہ امریکہ سے درآمدات 45.44 فیصد کے نمایاں اضافے سے 65 کروڑ 92 لاکھ ڈالر تک پہنچ گئیں۔ شمالی امریکہ کو پاکستان کی کل برآمدات میں امریکہ کا حصہ تقریباً 94 فیصد ہے۔
درآمدات میں یہ اضافہ امریکہ کے ساتھ طے پانے والے اس معاہدے کا نتیجہ ہے جس کے تحت پاکستان تجارتی عدم توازن کم کرنے کے لیے امریکہ سے اضافی سامان منگوا رہا ہے۔ گزشتہ مالی سال 2025-26 میں امریکہ کو برآمدات صرف 1.55 فیصد بڑھ کر چھ ارب 12 کروڑ 50 لاکھ ڈالر رہی تھیں، جبکہ امریکہ سے درآمدات تقریباً 39 فیصد اضافے سے تین ارب 26 کروڑ 50 لاکھ ڈالر ہو گئی تھیں۔
اسی سہ ماہی میں کینیڈا کو برآمدات 7.53 فیصد بڑھ کر 10 کروڑ 97 لاکھ ڈالر رہیں، لاطینی امریکہ کو برآمدات 118.64 فیصد اضافے سے دو کروڑ 16 لاکھ ڈالر ہو گئیں، جبکہ میکسیکو سمیت وسطی امریکہ کو برآمدات تقریباً چار کروڑ 53 لاکھ ڈالر پر مستحکم رہیں۔