افغانستان میں سرمایہ کاری کے فروغ کی جانب ایک بڑا قدم اٹھاتے ہوئے نائب وزیر اعظم برائے اقتصادی امور ملا عبدالغنی برادر نے بدھ کو ملک بھر میں خصوصی اقتصادی زونز کے قیام کے ایکشن پلان کی منظوری دے دی۔
امارت اسلامیہ کے سپریم لیڈر کے فرمان کے مطابق یہ زونز سات صوبوں کابل، بلخ، ننگرہار، قندھار، ہرات، پکتیا اور کندوز میں قائم کیے جائیں گے۔ یہ صوبے ملک کے بڑے تجارتی مراکز اور ہمسایہ ممالک سے تجارتی راستوں کے اہم دروازے سمجھے جاتے ہیں۔
منصوبے کے تحت وزارت صنعت و تجارت دیگر متعلقہ وزارتوں اور سرکاری اداروں کے تعاون سے ان زونز کے لیے درکار زمین کی نشاندہی کرے گی، وہاں ہونے والی شعبہ جاتی سرگرمیوں اور خدمات کا تعین کرے گی اور سرمایہ کاری کو راغب کرنے کے لیے ضروری حالات پیدا کرے گی۔
حکام کے مطابق ان زونز کا مقصد نئی سرمایہ کاری لانا، برآمدات اور درآمدات کے درمیان نسبتاً توازن قائم کرنا اور سازگار ماحول میں پیداواری سرگرمیوں کو وسعت دینا ہے، تاکہ ملک میں معاشی ترقی کے ایک نئے مرحلے کی راہ ہموار ہو سکے۔ یہ قدم ایسے وقت میں اٹھایا گیا ہے جب کابل حکومت نے حال ہی میں غیر ملکی سرمایہ کاروں کو راغب کرنے کے لیے نئی سرمایہ کاری پالیسی بھی منظور کی ہے۔