پاکستان تحریک انصاف کے بانی عمران خان کو بدھ کی علی الصبح اسلام آباد کے پاکستان انسٹی ٹیوٹ آف میڈیکل سائنسز (پمز) میں دائیں آنکھ کے علاج کے لیے چھٹا اینٹی وی ای جی ایف انجکشن لگایا گیا۔ پمز کے جاری کردہ بیان کے مطابق انہیں 10 اور 11 نومبر کی درمیانی شب راولپنڈی کی اڈیالہ جیل سے معائنے اور آنکھ کے فالو اپ علاج کے لیے اسپتال لایا گیا تھا۔
اسپتال کے بیان میں کہا گیا کہ طریقہ کار سے پہلے ان کا طبی معائنہ کیا گیا، جس میں آنکھ کا جائزہ بھی شامل تھا، اور ان کی تمام اہم طبی علامات نارمل پائی گئیں۔ بیان کے مطابق باخبر رضامندی لینے اور معیاری حفاظتی طریقہ کار اپنانے کے بعد امراض چشم کی ٹیم نے انجکشن لگایا، اور وہ پورے عمل کے دوران مستحکم رہے۔
پمز کے مطابق عمران خان تقریباً 40 سے 50 منٹ اسپتال میں رہے اور رات تقریباً ڈھائی بجے ضروری ہدایات کے ساتھ انہیں فارغ کر کے واپس اڈیالہ جیل منتقل کر دیا گیا۔
عمران خان کی دائیں آنکھ میں 'سینٹرل ریٹینل وین آکلوژن' کی تشخیص ہوئی تھی، یعنی ریٹنا تک خون پہنچانے والی رگ میں رکاوٹ، جس کے بعد ان کی بینائی متاثر ہوئی تھی۔ انہیں اس علاج کا پہلا انجکشن 24 جنوری کو پمز میں ہی لگایا گیا تھا۔
یہ پیش رفت ایسے وقت ہوئی ہے جب ایک روز قبل ان کی بہن عظمیٰ خان نے سپریم کورٹ سے رجوع کر کے اس مقدمے کی جلد سماعت کی درخواست کی تھی جو عمران خان کو علاج کے لیے اڈیالہ جیل سے شفا انٹرنیشنل اسپتال منتقل کرنے سے متعلق ہے۔ سپریم کورٹ نے 18 اگست کو انہیں شفا انٹرنیشنل منتقل کرنے کا حکم دیا تھا، تاہم انہیں پمز لے جایا گیا تھا، جس پر تحریک انصاف نے توہین عدالت کی درخواست دائر کر رکھی ہے۔