بلوچستان کے ساحلی ضلع گوادر میں جمعرات کو ہونے والے حملوں کے بعد سکیورٹی فورسز کی کارروائیوں میں ایک خاتون سمیت 10 دہشت گرد مارے گئے ہیں، جبکہ ان حملوں کے دوران ایک شہری جان کی بازی ہار گیا۔ پاک فوج کے شعبۂ تعلقات عامہ (آئی ایس پی آر) نے جمعے کو جاری بیان میں یہ تفصیلات بتائیں۔
آئی ایس پی آر کے مطابق 22 اکتوبر کو بھارت کی سرپرستی میں سرگرم ’فتنہ الہندوستان‘ سے تعلق رکھنے والے دہشت گردوں نے گبد بارڈر کراسنگ اور گوادر شہر کے علاقوں میں کارروائیوں کی کوشش کی۔ بیان میں کہا گیا کہ ان مقامات کو نشانہ بنا کر دہشت گرد انہی لوگوں کو نقصان پہنچانا چاہتے تھے جن کی نمائندگی کا وہ دعویٰ کرتے ہیں، اور بلوچستان کی ترقی کا راستہ روکنا چاہتے تھے۔ شہریوں کے تحفظ اور علاقہ کلیئر کرانے کے لیے گوادر شہر اور اس کے گرد و نواح میں آپریشن شروع کیا گیا۔
فوج کے بیان کے مطابق الگ الگ جھڑپوں میں دس دہشت گرد مارے گئے، حملوں کے دوران ایک شہری شہید ہوا اور چند گاڑیوں کو نقصان پہنچا، تاہم کارروائیاں سکیورٹی فورسز کے کسی جانی نقصان کے بغیر مکمل کر لی گئیں۔ آئی ایس پی آر نے حملے میں ایک بلوچ خاتون کو استعمال کیے جانے کو ریاست کے ساتھ ساتھ بلوچ خواتین کی حرمت کے خلاف جرم قرار دیا اور کہا کہ بلوچستان کے عوام اپنے نام پر خون بہانے والوں کو ہمیشہ مسترد کرتے آئے ہیں۔
اس سے قبل ذرائع کے مطابق ایسی تصاویر سامنے آئی تھیں جن کے بارے میں دعویٰ کیا گیا کہ ان میں فرنٹیئر ورکس آرگنائزیشن (ایف ڈبلیو او) کے ایک کمپاؤنڈ میں جھڑپوں کے بعد ایک خاتون سمیت چھ مبینہ حملہ آوروں کی لاشیں دکھائی دیتی ہیں، اور یہ غیر مصدقہ اطلاعات بھی تھیں کہ کمپاؤنڈ میں موجود تمام حملہ آور مارے جا چکے ہیں۔ کالعدم بی ایل ایف نے جمعرات کو گوادر میں ایف ڈبلیو او کے ایک کیمپ پر حملے کا دعویٰ کیا تھا۔ ان تصاویر کی صداقت کی آزادانہ تصدیق نہیں ہو سکی، اور سرکاری بیان میں ایف ڈبلیو او کمپاؤنڈ کا الگ سے ذکر نہیں کیا گیا۔
گوادر میں جمعرات کو ہونے والے واقعات کی ابتدائی تفصیلات یہاں پڑھی جا سکتی ہیں۔ آئی ایس پی آر نے کہا ہے کہ نیشنل ایکشن پلان کی وفاقی ایپکس کمیٹی کے منظور کردہ ’عزمِ استحکام‘ کے تحت انسدادِ دہشت گردی کی مہم پوری رفتار سے جاری رہے گی۔ یہ بیان ایسے وقت آیا ہے جب چند گھنٹے قبل فیلڈ مارشل عاصم منیر نے پشاور کور ہیڈکوارٹرز کے دورے میں دہشت گردوں کو سختی سے نشانہ بنانے کا عزم ظاہر کیا تھا۔