چیف آف ڈیفنس فورسز اور آرمی چیف فیلڈ مارشل سید عاصم منیر نے کور ہیڈکوارٹرز پشاور کا دورہ کیا ہے، جہاں انھوں نے عزم ظاہر کیا کہ فوج انڈیا کی سرپرستی میں سرگرم دہشت گرد تنظیموں کے خلاف اپنی مہم پوری قوت سے جاری رکھے گی اور انھیں ’جہاں بھی ہوں سخت نشانہ‘ بنائے گی۔ فوج کے شعبۂ تعلقات عامہ (آئی ایس پی آر) نے جمعہ کو جاری بیان میں یہ تفصیل بتائی۔
آئی ایس پی آر کے بیان کے مطابق فیلڈ مارشل کو خیبرپختونخوا کی موجودہ سکیورٹی صورتحال، جاری انسداد دہشت گردی کارروائیوں، سرحدی انتظام اور صوبے میں تعینات فارمیشنز کی آپریشنل تیاری پر تفصیلی بریفنگ دی گئی۔
بیان میں بتایا گیا کہ آرمی چیف نے افسروں اور جوانوں کے بلند حوصلے اور پیشہ ورانہ مہارت کو سراہا اور انھیں ہدایت کی کہ خطرات کا مؤثر مقابلہ کرنے کے لیے چوکسی اور آپریشنل تیاری کا اعلیٰ ترین معیار برقرار رکھیں۔
فیلڈ مارشل نے سکیورٹی فورسز کے شہدا اور غازیوں سمیت پاکستانی عوام کی قربانیوں کو خراج تحسین پیش کیا۔ آئی ایس پی آر کے مطابق ان کا کہنا تھا کہ عوام کی حمایت سے پاکستان دہشت گردوں اور ان کے ’گمراہ نظریے‘ کو یقیناً مکمل شکست دے گا۔
یہ دورہ ایسے وقت ہوا ہے جب خیبرپختونخوا میں پولیس اور سکیورٹی فورسز پر حملوں کی اطلاعات مسلسل آ رہی ہیں۔ بدھ کو ضلع کرک میں ایک حملے میں سی ٹی ڈی کے ڈی ایس پی سمیت چار پولیس اہلکاروں کی ہلاکت کی اطلاع سامنے آئی تھی۔