امریکی ریاست فلوریڈا کی پام بیچ کاؤنٹی میں اتوار کی دوپہر ایک چھوٹا کاروباری طیارہ رہائشی علاقے کی سڑک پر آ گرا، جس سے اس میں سوار تمام 9 افراد ہلاک ہو گئے۔ امریکی وزیر ٹرانسپورٹ شان ڈفی نے ہلاکتوں کی تصدیق کرتے ہوئے اسے "ہولناک سانحہ" قرار دیا۔
حادثہ مقامی وقت کے مطابق دوپہر تقریباً پونے ایک بجے کریسٹ ہیون کے قریب پیش آیا، جو صدر ٹرمپ کی رہائش گاہ مار اے لاگو سے تقریباً 14 کلومیٹر دور ہے۔ امریکی ہوابازی کے ادارے ایف اے اے کے مطابق لیئر جیٹ 60 ٹیکساس کے شہر آسٹن سے بہاماس جا رہا تھا۔ جائے حادثہ کی تصاویر میں چھ رویہ سڑک کے بیچ ایک گہرا گڑھا، جگہ جگہ آگ اور ملبہ بکھرا دکھائی دیتا ہے۔
ذرائع کے مطابق ایئر ٹریفک کنٹرول کی ریکارڈنگ میں پائلٹ کو ہنگامی حالت کا اعلان کرتے سنا جا سکتا ہے، جس میں وہ کہتے ہیں کہ طیارہ 20 ہزار فٹ فی منٹ کی رفتار سے نیچے جا رہا ہے اور "ہمارے پاس وقت ختم ہو گیا ہے۔" فلوریڈا کے گورنر رون ڈی سینٹس نے کہا کہ طیارہ "کسی میزائل کی طرح" نیچے آیا، تاہم اب تک زمین پر کسی کے ہلاک یا زخمی ہونے کی اطلاع نہیں۔
حکام کے مطابق قریبی ٹریلر پارک سے تقریباً 600 مکینوں کو منتقل کیا جا رہا ہے کیونکہ پانی کی لائنوں سمیت بنیادی ڈھانچے کو نقصان پہنچا ہے اور سڑک کم از کم 30 دن بند رہے گی۔ حادثے کے وقت علاقے میں گرج چمک کے ساتھ طوفان کی اطلاعات تھیں۔ طیارے میں سوار افراد کی شناخت ابھی ظاہر نہیں کی گئی، اور امریکی ادارہ این ٹی ایس بی حادثے کی تحقیقات کر رہا ہے۔