افغان تاجروں اور صنعت کاروں کا 13 رکنی وفد افغانستان اور ایران کے درمیان تجارتی اور اقتصادی تعلقات کو فروغ دینے کے لیے ایران روانہ ہو گیا ہے۔ ذرائع کے مطابق یہ دورہ ایران افغانستان چیمبر آف کامرس کی باضابطہ دعوت پر اور افغانستان ایران مشترکہ چیمبر آف کامرس کے تعاون سے ہو رہا ہے۔
دورے کے دوران وفد ایرانی اقتصادی حکام سے ملاقاتیں کرے گا، دو طرفہ تجارتی اجلاسوں میں شرکت کرے گا اور ملک کے مختلف صنعتی مراکز کا دورہ کرے گا۔ بات چیت میں سرمایہ کاری کے نئے مواقع، مشترکہ کاروباری منصوبوں کی توسیع، تجربات کے تبادلے اور دونوں ملکوں کے نجی شعبوں کے درمیان تعاون بڑھانے پر توجہ دی جائے گی۔
ایران افغانستان کے بڑے تجارتی شراکت داروں میں شامل ہے، تاہم حالیہ ہفتوں میں امریکی پابندیوں اور خطے میں جاری جنگ کے باعث ایران کی ہمسایہ ممالک کے ساتھ تجارت متاثر ہونے کی اطلاعات سامنے آتی رہی ہیں۔ ایسے میں دونوں ملکوں کے تاجر براہِ راست رابطوں کے ذریعے تجارت کو سہارا دینے کے خواہاں ہیں۔