خیبر پختونخوا کے جنوبی ضلع لکی مروت میں پولیس نے بدھ کو ایک مقابلے میں خودکش بمبار سمیت دو مشتبہ دہشت گردوں کو ہلاک کر دیا ہے۔ ضلعی پولیس کا کہنا ہے کہ اس کارروائی سے ایک بڑا دہشت گرد حملہ ناکام بنا دیا گیا۔
پولیس کے مطابق گنڈی چوک پر کالے شیشوں والی ایک مشکوک گاڑی دیکھی گئی، جس پر پولیس کی ٹیم فوراً موقع پر پہنچی۔ اہلکاروں کو دیکھتے ہی گاڑی میں سوار افراد نے فائرنگ شروع کر دی اور فرار ہونے کی کوشش کی۔ پولیس کی جوابی کارروائی میں گاڑی میں سوار دونوں افراد مارے گئے، جن میں سے ایک کے بارے میں پولیس کا کہنا ہے کہ وہ خودکش بمبار تھا۔
لکی مروت گزشتہ کئی ماہ سے شدت پسندوں کی سرگرمیوں کا مرکز رہا ہے، اور یہاں پولیس اور سیکیورٹی فورسز پر متعدد حملے ہو چکے ہیں۔ حکام کی جانب سے ہلاک ہونے والوں کی شناخت یا ان کی تنظیمی وابستگی کے بارے میں فوری طور پر مزید تفصیلات جاری نہیں کی گئیں۔