افغانستان کے صوبہ پنجشیر میں پانی کی شدید قلت سے نمٹنے کے لیے 32 نئے آبی نیٹ ورکس کا افتتاح کر دیا گیا ہے۔ صوبائی حکومت کے بیان کے مطابق 25 لاکھ امریکی ڈالر مالیت کے یہ منصوبے صوبائی دارالحکومت اور کئی اضلاع میں شروع کیے گئے ہیں۔
حکام کا کہنا ہے کہ ان نظاموں سے تقریباً 16 ہزار گھرانوں کو پینے کا صاف پانی فراہم ہو گا، جس سے ان برادریوں کو بڑا ریلیف ملے گا جو طویل عرصے سے محدود اور غیر یقینی آبی ذرائع پر گزارا کر رہی تھیں۔
خشکی میں گھرا افغانستان طویل خشک سالی اور آبی وسائل پر بڑھتے دباؤ کا سامنا کر رہا ہے۔ اس صورتحال میں حکومت نے ملک بھر میں ڈیموں، پانی کی فراہمی کے نیٹ ورکس اور آبپاشی نہروں کی تعمیر کا پروگرام تیز کر دیا ہے۔