وزیراعظم شہباز شریف نے جمعرات کو متعلقہ حکام کو ہدایت کی ہے کہ وزیراعظم فیول ریلیف پروگرام کے رجسٹرڈ مستحقین کو سہولت فراہم نہ کرنے والے پٹرول پمپوں کے لائسنس منسوخ کر دیے جائیں۔ وزیراعظم ہاؤس کے بیان کے مطابق انہوں نے پروگرام پر عمل درآمد اور اس کی شفافیت پر اطمینان کا اظہار بھی کیا۔
اجلاس کو بتایا گیا کہ اب تک ایک کروڑ 55 لاکھ 19 ہزار 282 شہری اس اسکیم میں رجسٹر ہو چکے ہیں، جن میں ایک کروڑ 50 لاکھ 60 ہزار موٹر سائیکل مالکان اور 800 سی سی تک کی گاڑیوں کے تقریباً چار لاکھ 49 ہزار مالکان شامل ہیں۔ اب تک چھ کروڑ 31 لاکھ سے زائد فیول ٹوکن جاری کیے گئے جن میں سے پانچ کروڑ 94 لاکھ سے زیادہ استعمال ہو چکے ہیں، اور 4 نومبر تک 28 ارب 60 کروڑ روپے کی ادائیگیاں کی جا چکی ہیں۔
حکام نے بتایا کہ صارفین اور پٹرول پمپوں کی معلومات اور شکایات کے لیے الگ الگ کال سینٹر قائم کیے گئے ہیں۔ ستمبر میں اعلان کردہ اس اسکیم کے تحت موٹر سائیکل اور رکشہ مالکان کو ماہانہ 20 لیٹر اور 800 سی سی تک کی گاڑیوں کے مالکان کو ماہانہ 30 لیٹر پٹرول پر فی لیٹر 100 روپے سبسڈی ملتی ہے۔ وفاقی کابینہ یہ پروگرام دسمبر کے آخر تک جاری رکھنے کا فیصلہ پہلے ہی کر چکی ہے۔