دفاعی چیمپئن پاکستان نے اے سی سی مینز انڈر 19 ایشیا کپ 2026 میں اپنی فتوحات کا سلسلہ برقرار رکھتے ہوئے منگل کو مسقط کے العامرات کرکٹ گراؤنڈ میں نیپال کو 101 رنز سے شکست دے دی۔
تین میچوں میں تین کامیابیوں کے ساتھ پاکستان نے گروپ اے میں پہلی پوزیشن حاصل کی اور سیمی فائنل کے لیے کوالیفائی کر لیا، جہاں جمعرات کو پہلے سیمی فائنل میں اس کا مقابلہ بنگلہ دیش سے ہو گا۔
پہلے بیٹنگ کرتے ہوئے پاکستان نے مقررہ 50 اوورز میں 7 وکٹوں پر 275 رنز بنائے۔ 64 رنز پر تین وکٹیں گرنے کے بعد احمد حسین اور کپتان فرحان یوسف نے چوتھی وکٹ کے لیے 135 رنز کی شراکت قائم کر کے اننگز سنبھالی۔ احمد حسین نے 73 گیندوں پر 89 رنز کی جارحانہ اننگز کھیلی، جبکہ فرحان یوسف نے 95 گیندوں پر 74 رنز بنائے۔ آخری اوورز میں حسنین عباس ڈار نے 23 گیندوں پر 25 رنز جوڑے۔
جواب میں نیپال کی پوری ٹیم 43.4 اوورز میں 174 رنز پر ڈھیر ہو گئی۔ احمد حسین نے آل راؤنڈ کارکردگی دکھاتے ہوئے 35 رنز دے کر 4 وکٹیں بھی حاصل کیں، جبکہ محمد حذیفہ اور محمد صیام نے دو، دو کھلاڑیوں کو آؤٹ کیا۔ نیپال کی جانب سے روہت چند 37 رنز کے ساتھ نمایاں رہے اور بپن شرما نے تین وکٹیں لیں۔