شمالی افغانستان کے صوبہ قندوز میں محکمہ تعمیرات عامہ نے قندوز-شیر خان بندر شاہراہ کے 46 کلومیٹر طویل حصے کی بحالی اور اسفالٹ کا منصوبہ شروع کر دیا ہے۔ شیر خان بندر تاجکستان کی سرحد پر واقع اہم تجارتی گزرگاہ ہے، اس لیے یہ سڑک وسطی ایشیا کے ساتھ تجارت کے لیے خاص اہمیت رکھتی ہے۔
محکمہ تعمیرات عامہ قندوز کے سربراہ عبدالناصر شیخ زادہ کے مطابق منصوبہ چھ ماہ میں مکمل ہوگا اور اس پر 2 کروڑ 4 لاکھ 32 ہزار افغانی سے زائد لاگت آئے گی۔ تعمیراتی کام میر بچہ کوٹ کنسٹرکشن کمپنی کرے گی، جس کے نمائندے میر سید ہارون سادات نے کہا کہ کام اعلیٰ معیار کے مٹیریل اور بین الاقوامی معیارات کے مطابق کیا جائے گا۔
قندوز کے گورنر مولوی نصر اللہ متین نے منصوبے کی اہمیت پر زور دیتے ہوئے کہا کہ محکمہ تعمیرات عامہ کے منصوبے قومی اثاثہ ہیں اور ملک کی تعمیر نو میں ہر شہری کو خلوص سے اپنا حصہ ڈالنا چاہیے۔ انہوں نے ترقیاتی منصوبوں اور عوامی خدمات کی بہتری کے لیے اپنی بھرپور معاونت کا یقین بھی دلایا۔