پاکستان نے بائیس سال پرانا مشین ریڈایبل پاسپورٹ کا نظام ختم کر دیا ہے۔ ڈائریکٹوریٹ جنرل امیگریشن اینڈ پاسپورٹس کے مطابق 23 اکتوبر 2026 سے ملک بھر کے تمام پاسپورٹ دفاتر اور بیرونِ ملک پاکستانی سفارتی مشنز صرف ای پاسپورٹ جاری کر رہے ہیں۔
جن شہریوں کے پاس مشین ریڈایبل پاسپورٹ موجود ہیں، وہ انہیں میعاد ختم ہونے تک استعمال کر سکیں گے۔ تاہم میعاد پوری ہونے کے بعد ان پاسپورٹس کی تجدید نہیں ہو گی اور حاملین کو نیا ای پاسپورٹ بنوانا ہو گا۔
پاکستان میں ای پاسپورٹ کا اجرا مارچ 2022 میں شروع ہوا تھا، جب ابتدا میں یہ سفارت کاروں اور اسلام آباد کے رہائشیوں کو دیا گیا۔ اگست 2023 میں تمام شہریوں کو مشین ریڈایبل یا ای پاسپورٹ میں سے کسی ایک کے انتخاب کا اختیار دے دیا گیا۔ مشین ریڈایبل نظام سے پہلے ملک میں 1947 سے ہاتھ سے لکھے پاسپورٹ جاری ہوتے رہے۔
ایک ہفتہ قبل قومی اسمبلی میں وقفۂ سوالات کے دوران وزارتِ داخلہ نے رکنِ اسمبلی ملک شاکر بشیر اعوان کے سوال کے جواب میں بتایا تھا کہ ایک ماہ کے اندر مشین ریڈایبل پاسپورٹ کا اجرا بند کر دیا جائے گا۔ نئے پاسپورٹ کے لیے درخواست دینے والوں کو اب براہِ راست ای پاسپورٹ ہی ملے گا۔