بلوچستان کے ضلع قلعہ سیف اللہ کے علاقے کلی نسائی میں سکیورٹی فورسز کے ایک انٹیلی جنس بنیادوں پر کیے گئے آپریشن میں کالعدم تحریک طالبان پاکستان کے سینیئر فیلڈ کمانڈر عادل شاہ عرف درویش کے مارے جانے کی اطلاع ہے۔
ذرائع کے مطابق درویش ژوب، شیرانی اور قلعہ سیف اللہ کے اضلاع میں سرگرم تھا اور مبینہ طور پر متعدد عسکری کارروائیوں میں ملوث رہا۔ سرکاری سطح پر اس آپریشن کی تفصیلات جاری نہیں کی گئیں اور اس دعوے کی آزادانہ تصدیق نہیں ہو سکی۔
اسی روز ضلع سوراب کے علاقے گدر میں جھڑپوں کے دوران پاکستانی فوج کے ایک اہلکار اور ایک مشتبہ بلوچ عسکریت پسند کے مارے جانے کی بھی اطلاع ہے۔ ذرائع کے مطابق فوجی اہلکار کی شناخت تاثیر کے نام سے ہوئی جو لائٹ کمانڈو بٹالین سے وابستہ اور پنجاب کے ضلع تلہ گنگ کے علاقے تحوہا کا رہائشی تھا۔ دوسرے ہلاک شدہ شخص کی شناخت سامنے نہیں آئی۔
ادھر کالعدم بلوچ نیشنلسٹ آرمی (بی این اے) نے دعویٰ کیا ہے کہ 29 ستمبر کو حب کے علاقے امیر آباد میں اینٹی ٹیررازم فورس کے اہلکار مولا بخش ولد امیر بخش کو اس کے ارکان نے فائرنگ کر کے قتل کیا تھا۔ تنظیم کے ترجمان نے اپنے بیان میں سکیورٹی فورسز سے تعاون کرنے والے پولیس اہلکاروں پر مزید حملوں کی دھمکی بھی دی ہے۔ اس دعوے کی بھی آزادانہ تصدیق نہیں ہو سکی۔