کراچی — گلشنِ حدید میں دکان کے مالک کی جانب سے فراہم کردہ تفصیلات کے مطابق اسٹیل ٹاؤن تھانے کی حدود، گلشنِ حدید فیز ون میں دیارِ حبیب مسجد کے قریب واقع ایس کے موبائل شاپ (SK Mobile) کو چھ مسلح ملزمان نے نشانہ بنایا۔ ملزمان مبینہ طور پر رات تقریباً 4 بجے دکان کے تالے توڑ کر 70 لاکھ روپے سے زائد مالیت کے موبائل فونز لے اڑے۔
واردات کے دوران دکان کے قریب موجود پان کیبن کے مالک کو بھی مبینہ طور پر اسلحے کے زور پر خاموش رہنے کی دھمکی دی جاتی رہی۔
دکان کے مالک کے مطابق مددگار 15 پر اطلاع دینے کے باوجود پولیس تقریباً ایک گھنٹے کی تاخیر سے موقع پر پہنچی۔ واردات کے بعد کرائم سین یونٹ کی ٹیم شواہد اکٹھے کرنے میں مصروف رہی۔
شہریوں اور تاجروں کا کہنا ہے کہ علاقے میں چوری، ڈکیتی اور اسٹریٹ کرائم کی وارداتوں پر تشویش برقرار ہے۔
ایس کے موبائل شاپ کے مالک نے آئی جی سندھ، ایڈیشنل آئی جی کراچی، ڈی آئی جی ایسٹ اور ایس ایس پی ملیر سے مطالبہ کیا ہے کہ ملزمان کو فوری گرفتار کیا جائے، چوری شدہ موبائل فونز برآمد کیے جائیں اور علاقے میں جرائم کی روک تھام کے لیے مؤثر اقدامات کیے جائیں۔
اس واقعے پر پولیس یا متعلقہ حکام کا مؤقف اس خبر کی اشاعت تک دستیاب نہیں تھا۔