خیبر پختونخوا کے ضلع خیبر کی تحصیل جمرود میں کالعدم تحریکِ طالبان پاکستان (ٹی ٹی پی) نے بدھ 28 اکتوبر کو ایک ویڈیو جاری کی ہے جس میں ورمندو میلہ کے علاقے میں فوجی چوکیوں کو نشانہ بنانے کا دعویٰ کیا گیا ہے۔
ذرائع کے مطابق ویڈیو میں چوکیوں پر حملوں کے مناظر دکھائے گئے ہیں اور دعویٰ کیا گیا ہے کہ ان کارروائیوں میں کواڈ کاپٹر (چھوٹے ڈرون) اور لیزر آلات استعمال کیے گئے۔ تاہم ان حملوں کے نتائج، ممکنہ جانی نقصان یا املاک کو پہنچنے والے نقصان کے بارے میں کوئی تفصیل آزادانہ طور پر سامنے نہیں آ سکی اور ویڈیو کے مندرجات کی بھی تصدیق نہیں ہو سکی۔
اس دعوے پر سکیورٹی حکام یا آئی ایس پی آر کی جانب سے تاحال کوئی ردِعمل سامنے نہیں آیا۔ کالعدم تنظیمیں ماضی میں بھی پروپیگنڈا مقاصد کے لیے ایسی ویڈیوز جاری کرتی رہی ہیں، اس لیے ان کے دعووں کو سرکاری تصدیق کے بغیر حتمی نہیں سمجھا جا سکتا۔
خیبر پختونخوا کے مختلف اضلاع میں حالیہ ہفتوں کے دوران کواڈ کاپٹر حملوں کی اطلاعات میں اضافہ ہوا ہے۔ اسی ہفتے بنوں میں ایک حجرے پر کواڈ کاپٹر حملے میں ایک بزرگ شہری کی ہلاکت کی اطلاع سامنے آئی تھی، جبکہ پاک افغان سرحد پر بھی کشیدگی برقرار ہے۔