بین الاقوامی ریڈ کراس کمیٹی (آئی سی آر سی) نے افغانستان بھر میں خواتین اور لڑکیوں کے لیے اپنی مدد کا دائرہ وسیع کر دیا ہے، جس میں صحت کی سہولیات، نقد امداد، پیشہ ورانہ تربیت اور معاشی خود مختاری کے پروگرام شامل ہیں۔
’’افغانستان: مشکلات کے باوجود خواتین اور لڑکیوں کو آگے بڑھنے میں مدد‘‘ کے عنوان سے جاری رپورٹ میں تنظیم نے بتایا کہ اس کی توجہ ماں کی صحت بہتر بنانے، غذائی قلت سے نمٹنے اور کمزور خواتین کے لیے روزگار کے مواقع پیدا کرنے پر ہے۔
رپورٹ کے مطابق آئی سی آر سی افغان ہلالِ احمر سوسائٹی کے ساتھ مل کر حاملہ اور دودھ پلانے والی ماؤں کو چھ ماہ تک نقد رقم اور غذائیت سے متعلق رہنمائی فراہم کرتی ہے۔ 2026 میں یہ پروگرام چار صوبوں کی 1,400 خواتین تک پہنچا۔
تنظیم ہلالِ احمر کے 47 صحت مراکز کی معاونت بھی کر رہی ہے، جہاں جون 2025 سے جولائی 2026 کے دوران خواتین کے لیے 8 لاکھ سے زائد او پی ڈی معائنے ہوئے۔ ان میں 980 سے زائد زچگیاں، ایک لاکھ 11 ہزار زچگی سے پہلے اور 39 ہزار زچگی کے بعد کے معائنے شامل ہیں۔