سردیوں کی آمد کے ساتھ ہی کراچی کے بڑے سرکاری اور نجی ہسپتالوں میں نزلہ، زکام اور فلو کی علامات والے مریضوں کی تعداد میں واضح اضافہ دیکھا جا رہا ہے، اور ڈاکٹروں کا کہنا ہے کہ شہر میں انفلوئنزا کا ایچ ون این ون وائرس، جسے عام طور پر سوائن فلو کہا جاتا ہے، گردش کر رہا ہے۔
ذرائع کے مطابق آغا خان یونیورسٹی ہسپتال میں رواں سال انفلوئنزا کے تقریباً 400 کیس رپورٹ ہوئے ہیں۔ ہسپتال کے شعبہ متعدی امراض کے سربراہ پروفیسر ڈاکٹر فیصل محمود کا کہنا ہے کہ انفلوئنزا کے وائرس وقت کے ساتھ اپنی شکل بدلتے رہتے ہیں اور سال کے آخر تک کیسز میں مزید اضافہ ہو سکتا ہے۔ ان کے مطابق ہر مشتبہ مریض کا ٹیسٹ نہیں ہوتا بلکہ عموماً شدید بیمار مریضوں کا ہی ٹیسٹ کیا جاتا ہے، اس لیے اصل تعداد زیادہ بھی ہو سکتی ہے۔
سول ہسپتال کراچی کے شعبہ ایمرجنسی کے سربراہ ڈاکٹر عمران سرور شیخ نے بتایا کہ گزشتہ چند دنوں میں فلو کی علامات کے ساتھ آنے والے مریض دگنے ہو گئے ہیں اور روزانہ 70 سے 80 مریض آ رہے ہیں۔ ان میں سے تقریباً دس مشتبہ انفلوئنزا کیسز کو ٹیسٹ اور مزید معائنے کے لیے ڈاؤ ہسپتال بھیجا گیا۔ جناح پوسٹ گریجویٹ میڈیکل سینٹر میں بھی فلو اور مشتبہ انفلوئنزا کے مریضوں میں اضافے کی تصدیق کی گئی ہے۔
علامات اور احتیاط
جناح ہسپتال کے ایمرجنسی شعبے کے ڈپٹی انچارج ڈاکٹر عرفان صدیقی کے مطابق تیز بخار، ناک بہنا اور کھانسی انفلوئنزا کی عام علامات ہیں، جبکہ کمزور قوتِ مدافعت والے افراد میں یہ انفیکشن نمونیا اور پھیپھڑوں میں پانی بھرنے جیسی سنگین پیچیدگیوں کا سبب بن سکتا ہے۔ ڈاکٹروں نے مشورہ دیا ہے کہ مریضوں کی دیکھ بھال کرنے والے اور کمزور افراد ماسک پہنیں اور دوسروں سے فاصلہ رکھیں۔
ماہرین نے ویکسین کو بچاؤ کا اہم ذریعہ قرار دیتے ہوئے بزرگوں، بچوں اور کمزور مدافعت والے افراد پر زور دیا ہے کہ وہ ڈاکٹر کے مشورے سے انفلوئنزا ویکسین لگوائیں۔ ساتھ ہی متوازن غذا، سوپ اور پانی سے بھرپور پھلوں کے استعمال کی بھی تاکید کی گئی ہے تاکہ جسم میں پانی کی کمی نہ ہو۔