بلوچستان میں کوئٹہ کراچی شاہراہ ایک بار پھر مسافروں کے لیے موت کا راستہ بن گئی۔ جمعے کو اوتھل کے قریب زیرو پوائنٹ پر ایک مسافر کوچ اور منی بس کے آمنے سامنے ٹکرانے سے کم از کم 12 افراد جاں بحق اور دو درجن کے قریب زخمی ہو گئے۔
پولیس کے مطابق کوچ گوادر سے کراچی جا رہی تھی جبکہ منی بس بیلہ سے کراچی کی طرف رواں تھی۔ حکام کا کہنا ہے کہ مسافر کوچ نے منی بس کو ٹکر ماری، جس کے نتیجے میں سات مسافر موقع پر ہی دم توڑ گئے اور پانچ زخمی ہسپتال پہنچ کر جانبر نہ ہو سکے۔
بیلہ میں ایدھی سینٹر کے انچارج عبدالحکیم لاسی نے بتایا کہ تقریباً 22 زخمیوں کو ہسپتال منتقل کیا گیا جنہیں بعد میں علاج کے لیے کراچی بھیج دیا گیا۔ ان کے مطابق سات زخمیوں کی حالت تشویشناک ہے اور زیادہ تر جانی نقصان منی بس میں سوار مسافروں کا ہوا۔
یہ حادثہ ایسے وقت پیش آیا ہے جب صرف دو روز قبل بدھ کو راجن پور کی تحصیل روجھان میں انڈس ہائی وے پر ایک مسافر بس روڈ ڈیوائیڈر سے ٹکرا کر الٹ گئی تھی، جس میں 10 افراد جاں بحق اور 44 زخمی ہوئے تھے۔ کوئٹہ کراچی قومی شاہراہ پر اس سال جنوری اور فروری میں بھی خضدار اور وندر کے علاقوں میں متعدد جان لیوا حادثات ہو چکے ہیں۔
یک رویہ اس شاہراہ پر تیز رفتاری اور آمنے سامنے تصادم کے واقعات برسوں سے مسافروں کی جان لے رہے ہیں، اور ہر نئے حادثے کے بعد اسے دو رویہ بنانے کا مطالبہ ایک بار پھر زور پکڑ لیتا ہے۔